भांगरभूंय | प्रतिनिधी
केरी-सत्तरी: सांखळे सम्राट क्लबा वतीन वसंतनगर सांखळे हांगा गोपाळकृष्ण शाळेंत गौरवशाली भारताचो सोपूत घेतलो. ह्या वेळार मंचाचेर सांखळे सम्राट क्लबाचे अध्यक्ष कृष्णा गांवस, क्लबाचे भांडारी शांताराम काणेकार, सम्राट क्लबाचे संचालक गजानन शेट्ये, शाळेचे सचीव संजीव काणेकार, मुख्याध्यापक सर्वेश बर्वे आनी हेर हाजीर आशिल्ले.
सम्राट क्लबाची प्रथा पाळीत अध्यक्ष कृष्णा गांवस हांणी घांट वाजोवन कार्यावळीची सुरवात केली. उपरांत सर्वेश बर्वे हांणी सोपूत घेतलो आनी तांचे फाटल्यान सगळ्यांनी घेतलो.
क्लबाचे अध्यक्ष कृष्णा गंवस हांणी विस्तृतपणान भारताच्या स्वातंत्र्योत्तर आनी स्वातंत्र्यपूर्व इतिहासाचेर भाशण केलें. भारतीयत्व ही संकल्पना तांणी विवीध उदाहरणा वरवीं मांडली आनी विद्यार्थ्यांक तांच्या कर्तव्यांची जाणीव करून दित मार्गदर्शन केलें.
क्लबाचे भांडरी शांताराम काणेकार हांणी सम्राट क्लबा विशीं चड म्हायती सांगली. तशेंच क्लबा वतीन आयोजीत विवीध कार्यावळींचो आढावो घेतलो. गोंयचे युवापिळगेच्या कलागुणांक वाव दिवपी असो हो क्लब. क्लबाचे संचालक गजानन शेट्ये हांणी ’प्लास्टिक बंदी’ यह्या विशयाचेर आपले विचार उक्तायले. तशेंच आपल्यो गरजो पुराय करपा खातीर प्लास्टिकाचो उण्यात उणो वापर कशे तरेन करूं येता हाचेर मतां मांडलीं. शाळेचे मुख्याध्यापक सर्वेश बर्वे हांणी शाळेंतली प्लास्टीक बंदी धोरणा विशीं म्हायती दिली आनी कशे तरेन प्लास्टिकाचो वापर उणो करपाक शकता हाचेर विचार मांडले. कार्यावळीचें सुत्रसंचालन शिक्षका कविता परब हांणी आनी उपकार शिक्षिका साक्षी देसाय हांणी मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
