भांगरभूंय | प्रतिनिधी
गोवा फॉरवर्डचे विकास भगत हांचो आरोप
मडगांव: काणकोणा गोवा फॉरवर्ड पक्षाची सभा पुलिसांनी राजकीय चेंपणा खाला बंद उडोवपाचो यत्न केल्ल्याचो गंभीर आरोप गोवा फॉरवर्डचे विकास भगत हांणी केलो. विरोधकांचो आवाज बंद उडोवपाक चेंपण तंत्राचो वापर करप हें पुरायेन चुकीचें, हे खातीर कोणाच्या सांगण्या वेल्यान कारवाय जाली, हाची चवकशी जावपाक जाय, अशी मागणी तांणी केली. तशेंच, सावंड परवान्या विशीं म्हायती नाशिल्ल्या उपजिल्लोधिकारी आनी थळाव्या वेंचणूक अधिकार्यांक पदावेल्यान काडचे, अशी मागणीय तांणी केली.
मडगांवां पत्रकार परिशद घेवन विकास भगत हांणी काणकोणा सभे मजगतीं जाल्लो प्रकार हो प्रशासकीय चुको आनी राजकीय चेंपणा खाला जाल्ल्याचें स्पश्ट केलें. ह्या वेळार तांचे वांगडा काणकोण गटअध्यक्ष दत्ता गांवकार आनी हेर पदाधिकारी हाजीर आशिल्ले.
गोवा फॉरवर्डान गावडोंगरी पंचायत हॉलांत सभे खातीर परवानगी घेतिल्ली. मात, हेर गरजेच्या परवानग्यां खातीर जेन्ना ते उपजिल्हाधिकारी कार्यालयांत गेले, तेन्ना तांकां सेगीत तीन दीस कोणूच मेळूंक ना. आचारसंहिता लागू जाले उपरांत तांणी वेंचणूक अधिकारी, उपजिल्लोधिकारी आनी पुलिसां कडेन अर्ज केलो. तेन्ना उपजिल्लोधिकारी आनी वेंचणूक अधिकारी हे सावंडाचे परवानगेची जापसालदारकी एकामेकांचेर धुकलताले. निमाणें, हो खर्च वेंचणुकेच्या खर्चांत लागतलो अशें सांगून सभेचो अर्ज स्वीकारलो.
तरी पुलीस निरीक्षक हरीश राऊत देसाय हे पुलिसां सयत सभेचे सुवातेर दाखल जाले. तांणी मायक बंद करीत सभा घेवपाक मेळची ना अशें सांगलें. हे कृतींतल्यान सरकारा कडल्यान विरोधकांचेर बंधनां हाडून तांचो आवाज चेंपपाचो यत्न जाता अशें विकास भगत हांणी म्हणलें.
भगत हांणी मुख्यमंत्री डॉ. प्रमोद सावंत हांचे कडेन मागणी केली की, तांणी पुलीस निरीक्षकांच्या फोन कॉल्सची म्हायती तपासची. खंयच्या मंत्र्यान चेंपण हाडलें हाची म्हायती घेवन त्या पुलीस अधिकार्याचेर बेगोबेग कारवाय करपाची मागणी तांणी केली.
ह्या प्रकरणाची जिल्लो वेंचणूक अधिकार्यांनी दखल घेवची आनी जापसालदारकेची म्हायती नाशिल्ल्या उपजिल्हाधिकारी तशेंच थळावे वेंचणूक अधिकार्यांची बदली करची, अशीय मागणी तांणी केली. हे विशीं गोवा फॉरवर्ड पक्ष वेंचणूक आयोगाक पत्र बरयतलें अशें तांणी सांगलें.
ह्या वेळार दत्ता गांवकर हांणी, लोकशायेंत वेंचणूक प्रक्रिया योग्य पद्धतीन आनी उत्सवावरीं जावची. विरोधी पक्षांकूय आपलीं मतां लोकां मेरेन पावोवपाचें स्वातंत्र्य मेळचें. विरोधकांचेर चेंपण हाडपाचे चुकीचे प्रकार जावपाक जायना अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
