भांगरभूंय | प्रतिनिधी
पणजी : झुआरीनगर, सांकवाळेच्या कावलां अड्ड्याक १२ दिसांनी दुसरे फावट उजो लागलो. मात उजो पालोवपी दळाच्या शिटूकपणाक लागून आशिकुशीक आशिल्ल्या सुमार २०-२२ कावलां अड्ड्यांक उज्या पसून सुरक्षीत दवरपाक येस आयलें.
हे विशीं चड म्हायती प्रमाण, आयतारा, ३० नोव्हेंबराक सकाळीं सुमार २ वरांचेर झुआरीनगर भागांत आशिल्ल्या कावलां अड्ड्याक उजो लागिल्ल्याची म्हायती वास्को उजो पालोवपी दळाक मेळ्ळी. उज्याक आनीक नेट आयिल्ल्याचें समजतांच वेर्णा, मडगांव, फोंडें, पणजी, एमपीटी आनी शिपयार्डच्या उजो पालोवपी बंबांक संपर्क केलो. उपरांत असिस्टंट डिविजनल ऑफिसर श्रीपाद गांवस हांच्या मार्गदर्शना खाला उज्याचेर नियंत्रण मेळोवपाक येस आयलें. सध्या जेसीबी मागयल्या. जेसीबी वरवीं हांगचें लासून गेल्लें सामान कुशीक काडटले आनी उपरांत लुकसाणेचो अदमास मांडटले.
व्हिडियो पळयात : https://youtu.be/XtjDZAhJkBE
झुआरीनगरच्या ह्या वाठारांत वट्ट २०-२२ कावलां अड्डे आसात. तातुंतल्याक एकाक उजो लागिल्लो. हे अड्डे सुरक्षीत आसात. १९ नोव्हेंबराकूय असो प्रकार घडिल्लो. तेन्नाय उजो पालोवपी दळाचे शिटूकसाणेक लागून उजो नियंत्रणांत हाडिल्लो आनी कोट्यांनी मालमत्ता लासून गोबोर जावचे पसून वाटयल्ली. उजो लागिल्ल्याचें नेमकें कारण सध्या मुखार येवंक ना. हे विशीं खोलायेन तपास सुरू आसा. फुडली कारवाय करतले, अशी म्हायती वास्को उलो पालोवपी दळाच्या जवानांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
