भांगरभूंय | प्रतिनिधी
पणजी: बंदी घातिल्ल्या एलईडी नुस्तेंमारी गियराचो वापर करून महाराष्ट्राच्या दर्याचे हद्दींत बेकायदेशीर नुस्तेंमारी केल्ल्या प्रकरणांत महाराष्ट्र नुस्तेंमारी खात्याच्या अधिकार्यांनी जप्त केल्ले दोन ट्रॉलर्स म्हजे न्हय आनी ते म्हज्या नांवाचेरूय नोंद नात, अशें आमदार केदार नायक हांणी सांगलें. जप्त केल्ल्या ह्या ट्रॉलरां कडेन विरोधक आपलें नांव जोडटा. हो राजकीय बदनामीचो यत्न आशिल्ल्याचो आरोपूय तांणी केलो.
नेमकें प्रकरण कितें?
कांय दिसां आदीं महाराष्ट्राच्या दर्याचे हद्दीचे नेम मोडून बेकायदेशीर नुस्तेंमारी केल्ल्या प्रकरणांत गोंयच्यो दोन ट्रॉलर्स महाराष्ट्र नुस्तेंमारी खात्यान जप्त केल्ले. सुत्रांनी दिल्ले म्हायती प्रमाण, जप्त जाल्ले हे ट्रॉलर्स बार्देसच्या एका आमदाराचे मालकीचें आशिल्ल्याचें उक्तें जाल्लें. हाका लागून आमदार केदार नायक हांकां हे विशीं विचारलें.
हाचेर माध्यमां कडेन उलयतना नायक हांणी स्पश्ट केलें, आपल्या कुटुंबाचो नुस्तेंमारी ट्रॉलराचो वेवसाय पिळग्यान पिळग्यो सुरू आसा. सध्या आपूण राजकीय जापसालदारकेक लागून व्यस्त आशिल्ल्यान, आपले मालकीचे चार ट्रॉलर्स हेरांक चलोवपाक दिल्यात. मात, महाराष्ट्रांत जप्त जाल्ल्या ट्रॉलरां कडेन आपलो कसलोच संबंद ना.
गोंयान महाराष्ट्र आनी कर्नाटकाचे वट्ट १६ ट्रॉलर्स केले जप्त
हे घडणुकेक लागून घडणुकेक लागून गोंय आनी महाराष्ट्र हांचे मदल्या नुस्तेंमारीच्या हद्दीवेल्यान सुरू आशिल्ल्या वादाक परत एक फावट धार मेळ्ळ्या.
ह्यान पयलीं गोंय नुस्तें विभागान आनी दर्यादेग पुलिसांनी जोड मोहीम राबयत गोंयचे हद्दींत बेकायदेशीरपणान नुस्तेंमारी करपी महाराष्ट्र (रत्नागिरी) आनी कर्नाटकांतल्या वट्ट १६ ट्रॉलर जप्त केल्ले. हातुंतले रत्नागिरीचे १० ट्रॉलर कळंगूटे धरिल्ले. नुस्तें खात्याचे मंत्री हळर्णकार हांणी तेन्ना कायदो मोडप्यांचेर खर कारवाय करपाचो पुनरुच्चार केल्लो.
गोंयान महाराष्ट्राचे ट्रॉलरीचेर कारवाय केले उपरांत, आतां महाराष्ट्रान गोंयचे ट्रॉलर्सचेर कारवाय केल्ल्यान दोनूय राज्यांतल्या वेवसायिकां मदीं ताण निर्माण जावपाची शक्यताय आसा. एकंदर, गोंयच्या आमदारां कडेन ट्रॉलर्सचें नांव जोडिल्ल्यान ह्या बेकायदेशीर नुस्तेंमारी प्रकरणाक आतां राजकीय वळण मेळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
