भांगरभूंय | प्रतिनिधी
पणजी : शालान्त मंडळा वतीन जावपी शिक्षक पात्रताय चांचणी खातीर (टीईटी) आतां मेरेन ४५३९ अर्ज आयल्या. अर्ज करपा खातीरची निमणी तारीख ह्याच म्हयन्यांत सोंपल्या.
शालान्त मंडळा वतीन टीईटी परिक्षा ९ डिसेंबर आनी १० डिसेंबर अशें दोन दीस जातली. पयल्या पेपराक (पेपर १) १८५७ जाल्यार दुसर्या पेपराक २३७५ उमेदवारांची नोंद जाल्या. दोनूय पेपरांक ३०७ उमेदवार आसात. शालान्त मंडळाचे अध्यक्ष भगीरथ शेट्ये हांणी ही म्हायती दिली.
पयली ते आठवी मेरेनच्या शिक्षकां खातीर शिक्षक पात्रताय चांचणी पास जावप सक्तीचें आसा. पयली ते पांचवी मेरेन पयलो पेपर जाल्यार सवी ते आठवी मेरेन दुसरो पेपर दिवचो पडटलो. दोनूय पेपरांक बसपाची लेगीत मेकळीक आसा. टीईटीचो पयलो पेपर ९ डिसेंबराक दनपरां ३ ते ५.३० मेरेन जातलो. दुसरो पेपर १० डिसेंबराक दनपरां ३ ते ५.३० मेरेन जातलो. उत्तर गोंयां खातीर सेंट झेवीयर उच्च माध्यमीक विद्यालय, म्हापशें आनी दक्षीण गोंयां खातीर रोझरी उच्च माध्यमीक विद्यालय, नावेली हीं परिक्षेचीं केंद्रां आसात. एका पेपरा खातीर १८०० रूपया जाल्यार दोनूय पेपरां खातीर ३ हजार रूपया शुल्क आसा. १५० गुणांचो पेपर आसतलो. सामान्य गटांत पास जावपा खातीर ९० गुण जाल्यार एससी, एसटी, ओबीसी गटांत पास जावपाक ८३ गुण गरजेचें. एकदां टीईटी परीक्षा पास जाले उपरांत एखादो मनीस केन्नाय शीक्षक पदा खातीर अर्ज करपाक शकता. तशेंच कितलेय खेपो परिक्षेक बसपाची मेकळीक आसा. राष्ट्रीय शिक्षण धोरण लागू जाल्या उपरांत आठवी मेरेनच्या शिक्षकां खातीर टीईटी परिक्षा पास जावप सक्तीचें आसा. हाका लागून गोंयांत परिक्षेक बसपी उमेदवारांचो आंकडो वाडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
