भांगरभूंय | प्रतिनिधी
पणजी : गोंयातल्या बेब्यांच्यो स प्रजाती कांय काळा भितर इतिहास जमा जावपाच्या मार्गार आसात. तातूंतल्यो दोन प्रजाती नश्ट जावपाच्या मार्गार, एक सुमार संकश्टांत आनी, एक गंभीर धोक्यांत आनी दोन प्रजाती असुरक्षीत श्रेणींत आसात. सकारात्मक गजाल म्हणल्यार गोंयांत नवे उभयचर आनी सरपटपी प्रजातींची नोंद जायत आसा, अशी म्हायती गोंय जैवविधताय मंडळान तयार केल्ल्या अहवालांतल्यान मेळ्ळ्या.
गोंय जैवविविधताय मंडळान तयार केल्ल्या गोंय जैवविधताय कृती आराखड्यांत डॉ. नितीन सावंत हांणी ‘उभयचर आनी सरपटपी संबंदीत प्रजाती’ ह्या विशयाचेर केल्ल्या विश्लेशणांतल्यान ही म्हायती मुखार आयल्या.
गोंयांत वट्ट 34 उभयचर प्रजातींची नोंद जाल्या. तातूंतल्यो 6 प्रजाती सैमाच्या संवर्धना खातीरच्या आंतरराष्ट्रीय संघटणेच्या (आययूसीएन) धोक्यांत आशिल्ल्या प्रजातींचे तांबडे वेळेरेंत येता, अशी गजाल अहवालांतल्यान मुखार आयल्या.
हे वळेरेंत दोन प्रजाती- ‘मलबार ट्री टोड’ हो बेबो आनी ‘इंडियन डोट फ्रोग’ ही बेबकी नश्ट जावपाच्या मार्गार हे श्रेणींत येतात. ‘मलबार फ्रोग’ हे बेबकेची एक प्रजाती सुमार संकश्टांत श्रेणींत, ‘आंबोली बुश फ्रोग’ ही एक बेबकेची प्रजाती गंभीर धोक्यांत श्रेणींत आनी असुरक्षीत श्रेणींत ‘बॉम्बे बबल-नेस्ट फ्रोग’ आनी ‘बॉम्बे नायट फ्रोग’ ह्या दोन बेबक्यांच्यो प्रजाती येतात. मजगतीं, गोंयांत वट्ट सरपटपी जनावरांच्यो 40 नव्या प्रजातींची नोंद जाल्या. गोंयच्या सरपटपी आनी उभयचर जैवविविधतायेंत हालींच ‘गोवन स्लेंडर गॅको’ ही पाल आनी गोंयची ही बेबकेच्या प्रजातींची नव्यान नोंद जाल्या. नवे सोद आनी नवी उपस्थिती अहवालाक लागून गोंय राज्यांत उभयचर आनी सरपटपी प्रजातींची दिसान दीस वाड जायत आसा, अशें अहवालांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
