भांगरभूंय | प्रतिनिधी
सावयवेरें: स्वातंत्र्याचो अमृत महोत्सव मनयतना कुर्टी – फोंडें हांगच्या अमेय उच्च माध्यमीक विद्यालयाच्या विद्यार्थ्यांनी राष्ट्रीय तिरंगो रॅलीचें आयोजन केल्लें.
अमेय विद्याप्रसारक मंडळाचे अध्यक्ष संदीप खांडेपारकार, सचीव भार्गव कोरडे, सर्वोदय शिक्षण संस्थेचे अध्यक्ष रामकृष्ण गावडे हांचे हस्तुकीं रॅलीचें उक्तावण जालें. तिरंगो म्हळ्यार त्यागाचें आनी देश प्रेमाचें प्रतीक जावन आसा. राष्ट्रीय तिरंग्याचो अपमान म्हळ्यार देशाचो अपमान. असो अपमान जावपा सारकें आमचे कडल्यान एकूय वायट गजाल जावपाक जायना, अशें खांडेपारकार हांणी ह्या वेळार सांगलें.
विद्यालयाचे जेश्ठ शिक्षक प्रा. संदीप शिलकार, प्रा. सुभाष जाण हांचींय ह्या वेळार भाशणां जालीं.
कुर्टी – फोंडें हांगचे शाळेच्या वाठारांतल्यान सुरू जाल्ली तिरंगो फेरी नागझर, कोटवाडो, नागा मस्जीद, साई सर्वीस अशा मार्गान येत सिंधूनगर कॉलनीत येवन सोंपली. सगळ्या विद्यार्थ्यांच्या हातांत तिरंगो, देशभक्तीपर गीतां, भारत माता की जय आनी वंदे मातरमच्या घोशणांनी कुर्टी वाठार देशभक्तीमय जाल्लो पळोवपाक मेळ्ळो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
