भांगरभूंय | प्रतिनिधी
वाडेकर मास्तरान यशोदामाय कृष्णाक जेवयतना चंद्र दाखोवन जेवण भरयताली ही काणी शाळेंत सांगिल्ली. एकाच रुमांत सगल्यो क्लासी म्हणून आसत, दुसऱ्या वर्गाक सांगिल्ली काणी सगळ्यांक कळटाली. दिगूक कथा आवडलेली. ताची आवय सावित्री केन्नाच ताका अशो काणयो सांगनाशिल्ली. तिचेय बिचारीची कसली चूक नासली, सात भुरग्यांची आवय, कोणाकोणाक घेवन काणी सांगूक शकताली! घरांत भुरगीं सात, शिवाय मांयमांव, आनी ते कमी म्हणून विश्वासाकडे काम करणारे लोक हांचो घरांत वावर, तांची वास्तापूस तिकाच करपाक पडटाली. तर दिगूक चंद्राची काणी आवडिल्ली. चंद्राचेर आपूणय कितें नविदाद करया अशें ताणें थारायलें. मात कितें कळनासलें. पूण जुलय म्हयन्यांत दोन अशो काणयो घडल्यो तांणी तागेल्या विचारांक चालना दिली. कितें जालें म्हळ्यार त्या म्हयन्यांत एका फाटोफाट दोन गिराणां जालीं. एक सुर्यगिराण आनी दुसरें चंद्रगिराण, या चंद्रगिराणाचेर खूब चर्चा घरांत चलताली. ती आयकून ताणें शाळेंत इश्ट-इश्टिणींखक चंद्रदर्शन करपाचें थारायलें. एक दीस घरची बॅटरी तो कोणाक सांगनातना घेवन शाळेंत आयलो. ताचे खातीर ताका खूब खटाटोप करचे पडले.
बॅटरी सदांच आवय बापायच्या कुडींत आसताली. ती थंयच्यान भायर काडप म्हाकठीण काम. मात एक दीस दिगूली आवय ती सालांत विसरली आनी ती संद दिगून घेतली. तरी पूण आवय आनी ताची व्हडली भयण ताईची तिक्ष्ण नजर चुकोवन घरातली वस्त घेवन शाळेंत व्हरप म्हणजे पुर्तुगीजांच्या हातांतल्यान सुटप अशें… पूण ताणें तें व्हडलें धाडस धिटायेन केलें. शाळेंत ताणें बॅटरी एका कोनश्याक फातराचो तिरपो तेंको दिवून पेटोवन दवरली. ते बॅटरीचो उजवाडाचो वाटांगुळो उजवाड चक्रावशेन, शाळेवेल्या नळ्यांचेर पडलो आनी पळोवपाक गेल्यार मळबांत पुनवेचो चंद्र दिसता तशें तें सोबीत चित्र शाळेच्या नळ्यांचेर दिसतालें. जालें, दिगून ती गजाल अकरा वरांचेर जाता ते सुटयेंत चुलतभाव दास बोरकाराक अपुरबायेन दाखयली.
ताणें व्हडल्या दबाज्यान हेर भुरग्यांक हळूहळू करून पुनवेचो चंद्र धर्मशाळेच्या नळ्यार उगवेल्लो दाखयलो. तांगेली विचार करपाची शक्त आनी प्रदर्शीत केल्ले तर्क आयकल्यार व्हडले खगोल शास्त्रज्ञय अजाप जातले आसले. वाडेकार मास्तर घरा वचून चा पिवून परत आयलो तरीपूर्ण भुरग्यांक ताची खबर ना. पुनवेचो चंद्र दिसा धर्मशाळेच्या नळ्यार अकस्मात उदेलो कसो हाचेर तांचें मंथन चलिल्लें. निमाणे कडेन बाडेकार मास्तरान कोनशाक उबी दवरलेली बॅटरी सोदली. आनी ती बॅटरी बोरकारांच्या घरांतली हे कळटकच दिगूचें बिंग फुटलें, पूण अजून पुनवेचो चंद्र शाळेंत उगविल्याची काणी वास्कोच्यो आवयो सान भुरग्यांक जेवयताना सागंतात.
दीपक पाणंदीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
