भांगरभूंय | प्रतिनिधी
चेन्नय, खबरां संस्था ः श्रीलंकेत ‘दितवाह’ चक्रीवादळान धुमशेण काडले. हातूंत 123 जाणांक मरण आयलें. जायते जाण गंभीर जखमी जाल्यात आनी कांय जाण बेपत्ता आसात. देखून मरण आयिल्ल्यांचो आंकडो वाडपाची शक्यताय आसा. सुमार 130 जाण बेपत्ता आसात.
भारतांत कर्नाटक, केरळ, तमिळनाडू, आंध्र प्रदेश आनी तेलंगणा ह्या पांच राज्यांनी पावसाचो अलर्ट जारी केल्या. तमिळनाडूंत 54 विमानां रद्द केल्यात. तशेंच शाळा आनी म्हाविद्यालयांक सुटी जाहीर केल्या. सादूर रावपाचो आदेश जारी केलां.
श्रीलंकेत चक्रीवादळाक लागून खर वारें आनी व्हड पावस पडटा. हाका लागून हुंवार आयला. पुराय वाठारांत उदक भितर भरलां आनी जायत्या सुवातींनी पालसणां केसळ्ळां. प्रशासना कडल्यान बचावाचे काम सुरू आसा. श्रीलंकेक भेट दिवची न्हय असो उलो पर्यटकांक मारला.
भारताची श्रीलंकेक मजत
भारतान श्रीलंकेक मजत केल्या. चक्रीवादळाक लागून मरण आयिल्ल्यांक प्रधानमंत्री नरेंद्र मोदीन दुख्ख उक्तायलां. हे कठीण परिस्थितींत श्रीलंकेक पुराय सहकार्य दिवपाक आपूण तयार आसा अशें तांणी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
