भांगरभूंय | प्रतिनिधी
क्रेडीट सोसायटींक जनऔशधी, गॅस एजन्सी सुरू करपाक मेळटली
भांगरभूंय । प्रतिनिधी
पणजी : सहकार वाठारांचो विस्तार तशेंच उदरगत करपा खातीर केंद्र सरकारान तरेकवार नवें उपक्रम सुरू करपाचो निर्णय घेतला. हेच धरतीचेर गोंयांत लेगीत मुळाव्या शेतकरी क्रेडीट सोसायटींचो (पीएसीएस) आंकडो वाडपा सयत तांकां वेवसायीक मळार नवें उपक्रम सुरू करपाक मेळटलें. 2029 मेरेन गोंयच्या दरेक गावांत शेतकरी क्रेडीट सोसायटी जातली. तशेंच जनऔशधी केंद्र, गॅस एजन्सी, पॅत्रोल/डिजेल विक्री अशें वेवसाय करपाची संद तांकां मेळटली. हे उद्दीश्ट साध्य करपा खातीर सहकार खात्यान तरेकवार खात्यांच्या अधिकाऱ्यांची समिती स्थापन केल्या.
हे समितीची अधिसूचोवणी जारी जाल्या. राज्याच्या सगळ्या पंचायत वाठारांनी उण्यांत उणीं एक तरी शेतकरी सोसायटी वा क्रेडीट सोसायटी आसपाक जाय. तांचो वेवहार वाडपाक जाय, अशें केंद्रीय सहकार मंत्रालयाचे धोरण आसा. ह्या धोरणाची कार्यवाय गोंयांत लेगीत सुरू जातली, अशें सहकार मंत्री सुभाष शिरोडकार हांणी सहकार सप्तका वेळार स्पश्ट केल्लें. हे प्रमाण समिती स्थापन करपा विशींची अधिसूचोवणी जारी जाल्या.
2029 मेरेन शेतकरी क्रेडीट सोसायट्यांनी हे नवे उपक्रम सुरू जातले :
० धान्याचो सांठो करपा खातीर गुदांव
० पीएम जनऔशधी केंद्र
० सेवा केंद्रा (सीएससी)
० पीएम किसान समृद्धी केंद्र
० पॅत्रोल/डिजेल विक्री आउटलेट
० एलपीजी डीलरशीप
सहकार सचीवांच्या फुडारपणा खाला समन्वय समिती स्थापन जाल्या. गोरवां पोसपी खात्याचें सचीव, नुस्तेंमारी खात्याचें सचीव, नागरी पुरवण खात्याचें सचीव, पंचायत सचीव, भलायकी सचीव, वीज सचीव, नाबार्डचे सरवेवस्थापक, पंचायत खात्याचें मुखेली, नागरी पुरवण खात्याचें मुखेली, सहकार भारती अध्यक्ष, गोवा बागायतदार सहकारी संस्थेचे अध्यक्ष, गोंय राज्य दुद उत्पादन संघाचे अध्यक्ष हे समितीचे वांगडी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
