भांगरभूंय | प्रतिनिधी
आयला दीस असो सुवर्णमयी कसो
उतरांचे जातले हिरे
खोशेन फुल्ली नदर
सुरांत सूर जळून
किरणांनी भरले करे
आंगार कांत कला चडूं दीस दिशीं
येवची जिवाक पुर्णता
दोगांयच्या नतमस्तकार शिंवरता
रंगीत गंधाक्षता ।। १ ।।
मंत्रांचो महिमा नभाक समजावंक
होमाचो केलो धुंवर
सर्गाची प्रीती पारिजात परमळूं
आशीर्वादाचो चंवर
घाल्ली गाठ अशी सहज जगदिशान
सोडोवंक कोणाच्यान नजो
साक्षी मित्रांगण तशेंच रुशीमुनी
साक्षी सनातन उजो ।। २ ।।
संवसारी कसरतींत एकामेकांक
सावरचें एकामेकांन
पांवलां दो कडचीं अशीं वांगडा येवन
चलचीं मोगाच्या दिकान ।। ३।।
पोरसांत धोलचीं बरीं फुलां विवीधशीं
हांसचीं घरांत आयदनां
येवकार मेळचो सदांच येत्या वत्यांक
जाण्ट्यांची राखचीं मनां ।। ४।।
सपनां खेळचीं मनांत नव्या घरघनात
कसलेंच नासचें उणें
सगल्यांनी गुण गावचे रुप गुणांत
दांपत्य हें देखदिणे ।।। ५।।
एकदांच फुलता खरो वसंत जिवनांत
पावसाळे कितले मुखार
रोखडोच येवचो रुपाक कळो जितोजिवो
संवसार सुखाच्या रुखार ।। ६ ||
कोंकणीभाषकांचे मागणे वयल्यान
बरोवपी : मनोहरराय सरदेसाय
दिलीप नायक हांच्या बऱ्यापणान
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
