भांगरभूंय | प्रतिनिधी
आरबीआयन मार्गदर्शक तत्वांचो मसुदो केलो जारी
मुंबय, खबरां संस्था ः रिझर्व्ह बँक ऑफ इंडियान देशाच्या रीण संरचनेक घटमूट करपा खातीर 26 नोव्हेंबराक मार्गदर्शक तत्वांचो मसुदो जारी केला. ही तत्वां 1 एप्रील 2026 सावन लागू जातली.
आतां क्रेडीट स्कोअर अपडेट करपा खातीर चड वेळ वाट पळोवची पडची ना. सगळ्या क्रेडीट इन्फॉर्मेशन कंपनींक (CICS) दर 7 दिसांनी क्रेडीट स्कोअर अपडेट करचो पडटलो. सध्या 15 दिसांनी एक फावट स्कोअर अपडेट जाता.
सीआयसीएसाक (CICS) दर म्हयन्याच्या 7, 14, 21 आनी 28 तारखेर आनी म्हयन्याच्या निमाण्या दिसा मेरेन डेटा अपडेट दवरचो पडटलो. दर म्हयन्याच्या 3 तारखे मेरेन बँको डेटा धाडटले.
ह्या 4 तारखांक नवे बदल म्हळ्यार इंक्रीमेंटल डेटा धाडटले. हातूंत खातें उगडप, बंद करप, क्रेडीट स्कोअराचेर परिणाम करपी बदल वा रिणाचे स्थितीं बदल अशे डेटा आस्पावीत आसात.
बदलाचे 4 थेट फायदे
रीण वा क्रेडीट कार्ड बंद केल्ल्याची म्हायती बँकेक त्याच दिसा सिबिलाक दिवची पडटली. पयलीं हाका सप्तक वा म्हयने लागताले. गिरायकांक रीण मेळोवपाक अडचणी येताल्यो.
गिरायकाचे परवानगे बगर बँको आनी एनबीएफसी क्रेडिट रिपोर्ट ॲक्सेस करूंक शकनात. हाका लागून सिबिलाचो स्कोअर गरजे भायर उणो जावचो ना. क्रेडीट प्रोफायल सुरक्षीत उरतली.
चुकीचो अहवाल दिवप, दुरुस्तींत कळाव वा परवानगे बगर क्रेडिट तपासणी केल्यार व्हड दंड घालतले. हाका लागून बँकांक क्रेडिट डेटा चड अचूक आनी अपडेट दवरचो पडटलो आनी गिरायकांक स्कोअरांत बेगीन सुदारणा मेळटली.
बँकांक ताजो क्रेडीट रिपोर्ट मेळटलो, जाका लागून जोखमीचें बरे तरेन मुल्यांकन करपाक मेळटलें. रिणाचो खर्च म्हळ्यार व्याजदर, रक्कम आनी कार्यकाळ योग्य रितीन थारावंक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
