भांगरभूंय | प्रतिनिधी
गोंयचो तिसरो जिल्हो जातना दोन जिल्हो पंचायतींक अधिकार मेळपाची गरज आसा. अंदूं जिल्हो पांवड्यार वेंचून येवपी उमेदवारांनी ती मोख दवरची. जिल्हो पंचायत वांगड्यांक अधिकारांचें बळगें मेळ्ळ्यार विधानसभेच्या आमदारांचें वजें उणें जातलें. ल्हानसान कामा पासत नागरीक आमदारां कडेन धांवतात. सरकारी कामां बेगीन जावपा पासत आमदारांक 24 वरां वावुरचें पडटा. पंचायत ते जिल्हो पांवड्यार विधानसभा पांवड्या वयल्या लोकप्रतिनिधींच्या तेंक्यान वांगडी वेंचून येतात. जिल्हो वांगड्यांक अधिकार मेळोवन दिवपा पासत झगडप आमदारांचीय लागणूक.
गोंयचे सत्तरी, काणकोण, पेडणें तालुके राजपाटण पणजी, मडगांव, फोंडें, दिवचल, वास्को, म्हापशें ह्या मुखेल शारांक लागीं आयल्यात. रस्ते, पूल बांदिल्ल्यान उदरगतीचे नवे दिकेन गोंय गेलां. उदरगतींतल्यान येरादारी, म्हायती तंत्रज्ञान साधनसुविधांतल्यान पंचायत, ते विधानसभा यंत्रणा जोडप शक्य जालां. प्रशासन उदरगतीचे दिकेन वतना दिशिल्लीं उणेपणां पयस जावपाक जाय. सरकारी यंत्रणेंत जाय त्या तांकीचें सरकारी कर्मचारी नासत जाल्यार समेस्तां मेरेन उदरगत कशी पावतली? जिल्हो यंत्रणेक कामाचें वांटप दिवपा पासत सरकारान निर्णय घेवचो. तेविशीं राज्य वेंचणूक आयुक्तांनी दिल्ले नियाळ आसतलेच. पंचायत मंत्र्यांनी फाटल्या जिल्हो पंचायतींच्या वांगड्यां बराबरीन कितल्यो बसका घेतल्यो? जिल्हो पंचायतींक अधिकार दिवपा पासत राज्य वेंचणूक आयोग, राज्य वित्त आयोग हांच्यो बसका जाल्यो? हेर राज्यांच्यो जिल्हो पंचायती, परिशदो पळयल्यार गोंय फाटीं खंय? किद्याक? ती जाप मेळटली.
सरकारी पांवड्यार कायदे व्हड प्रमाणांत जाल्यात, म्हायती तंत्रज्ञान आयुर्वेद, होमीओपॅथी मेरेनय पावलां. आयुर्वेदीक, होमीओपॅथी दोतोरांक वैजकी शास्त्राच्या मुखेल पांवड्यार हाडपा पासत सरकारान वावर केला. पयलें विधेयक हाडपाच्या वावरांत मुख्यमंत्री डाॅ. प्रमोद सावंत आशिल्ले. तांच्या प्रयोगाक कायद्याचे फास्केंत बसोवन मान्यताय मेळोवपाक जापसालदार आशिल्ले आदले मुख्यमंत्री मनोहर पर्रीकार. ते इंजिनियर आशिल्ले तरी गोंयच्या वखदी वनस्पतीच्या दायजाची वळख तांकां आशिल्ली. आपल्या आवय- बापायच्या, घराब्याच्या दायजांतल्यान ते व्हड जावन राजकारणांत पावले. आंदोलनांतल्यान, रस्त्यार देंवत, दुकानांत कांदे बटाट्याच्यो पुडयो बांदून.
आयज इंजिनियरिंगाच्या ल्हानांतल्या ल्हान अभ्यासक्रमांतय (स्ट्रीम) म्हायती तंत्रज्ञान आयलां. मोबायलार ल्हानपणा सावन शिकपाचीय विदेशांत संद मेळटा. ताचे वायट परिणामय जाल्यात. मोबायलांनी जेन्ना शिक्षक घुस्पतले तेन्ना शिक्षकाचेंय मूळ शेणटां. राजकारणीय मोबायलांत, आर्टिफिशयल इंटेलिजन्साच्या संवसारांत वावुरतात तातूंत आदल्या तेंपा वयलेय आसात. जिल्हो पांवड्यारय आर्टिफिशल इंटेलिजन्स, वेवस्थापन शास्त्र धावी, बारावी, पदवी पांवड्यार शिकिल्ले, सत्तर ते चाळीस टक्के मार्क मेळयिल्ले वांगडी गोंयाक अंदूंचे वेंचणुकेंतल्यान मेळटले. अणभवांतल्यान पन्नासांतले धा आमदारय फुडारांत जातले. जिल्हो पंचायत पांवड्यार वेंचून आयिल्ल्या वांगड्यांतल्यान विधानसभे खातीर उमेदवार मेळटले हातूंत दुबाव ना.
जिल्हो पंचायतींक अधिकार दिवपाची मोख सगल्या राजकी पक्षां मुखार येवपी वेंचणुकेंत आसची. उदरगतींतल्यान फुडें वतना गोंयांतलीं मुळावीं भलायकी केंद्रां, शाळा, पंचायती, न्हंय सांबाळ, पियेवपाचें उदक, रस्ते, पूल, दूद केंद्रां, मार्केट वेवस्था तशेंच समाजीक जीण कशी आसा तें सोदून काडपाची जापसालदारकी जिल्ह्यांक दिवपाची गरज आसा. तातूंतल्यान राज्या खातीर मुळावें नियोजन जिल्हो पांवड्यार तयार जातलें.
पंचायत पांवड्यार वावुरिल्ल्या अस्तुरी सक्षमीकरणांतल्यान पयले, दुसरे जिल्हो वेंचणुकेंत मुखार सरिल्ल्या नेली राॅड्रिग्ज, शुभदा सावयकार, अमोल मोरजकार पदवी मेरेन शिकिल्ल्यो अस्तुरी. जिल्हो अध्यक्षपदां तांणी वेंचून येवन सांबाळ्ळीं. आयज अमोल मोरजकार आमचे मदीं नात, तांच्या वावराचो लाव आमदार डिलायला लोबो हांकां मेळ्ळा. नेली, शुभदा राजकारणांत, समाजीक वावरांत आसात. शुभदा नगरपालिकेंत पावलें, नेलीचो नारी शक्ती अभियानांतलो वावर अज्रंवर उरला. विधानसभे मेरेन तीं पावलीं नात, पूण लोकां पासत वावुरतात, जिल्हो पांवड्यार अधिकार मेळचे पासत तीं झगडलीं. शुभदाच्या मतदारसंघातल्यान अस्तुरी आमदार, मुख्यमंत्रीय फुडारांत मेळूंक शकता. गुणेस्त, राजकी तांक आशिल्ल्या शुभदाक केंद्रीय पांवड्यार धाडपाची वाट जिल्हो वेंचणुकेंतल्यान दिसतली. शुभदा वरी खांबो प्रदेश भाजपाक जिल्हो पंचायतीच्या अधिकारांचो अजेंडा तयार करपाक उपेगी.
शुभदा, नेलीन अस्तुरेक बळगें दिवपाचो केल्लो वावर सरकारान नदरे आड करचो न्हय. जिल्हो पांवड्यार अस्तुरी सक्षमीकरणाक तांची मजत जातली. शिक्षणांतल्यान मुखार वतना अनुसुचीत जाती, जमातींतल्यान कणखर अस्तुरेचें नेतृत्व जिल्हो पांवड्याकच न्हय गोंयाक मेळपाक जाय. तें राजकी दायजांतल्यान मुखार सरिल्लेंय आसुये.
शिकिल्ली अस्तुरी राजकारणांत येतली तेन्ना भ्रश्टाचार व्हड प्रमाणांत जातलो अशेंय चित्र उबें करपाचो यत्न जाता. खऱ्या गुन्यांवकाराची म्हायती वर्सा भितर सरकार लोकांक दितलें हें उतर जिल्हो वेंचणुकेंतल्या प्रचारांत मेळटलें अशी आस्त बाळगुया. पुलीस स्टेशनां जिल्हो पंचायत पांवड्यार पावोवपाची गरज आसा व्हय? नवें पुलीस प्रशिक्षण केंद्र, वैजकी हाॅस्पिटल आनी म्हाविद्यालय, दक्षीण गोंयाक मेळपा पासत दक्षिणेंतल्या जिल्हो वांगड्यांनी एकवटान आवाज उठोवचो पडटलो. तेखातीर अभ्यास करून सुचोवण्यो केल्यार सरकार फुडल्या पांच वर्सांत 2026 वर्स सोंपतना वावराक लागिल्लें आसतलें.
विधानसभेचे चाळीसय मतदारसंघ, मतदारां मेरेन वचपाची तांक आशिल्ले मुख्यमंत्री, कांय मंत्री भाजपचो प्लस पाॅयंट. नव्या भाजप प्रदेशाध्यक्षांक आदल्या अध्यक्ष, खासदारांचो व्हड आधार.
केंद्रीय मंत्री श्रीपाद नायक समेस्तां मदीं पुता खातीर वचूंक शकतात. तांचो अणभव, तांचें सादेंपण समेस्तांक भावता. प्रदेश भाजपाक जिल्हो वेंचणुकेंत नवीं मुखामळां हाडपाक तांचोय तेंको आसतलो. तरणाट्यां खातीर, उमेदवार वेंचून हाडपा पासत ते वावुरतले.
गोंयचें राजकारण बदलतना जिल्हो पांवड्यार जिल्हो पंचायतींच्या वांगड्यांनी केल्ल्या कामकाजाचो नियाळ पंचायत खात्यान लोकां मुखार दवरचो. जिल्हो पंचायतींतले कार्यकारी, मुखेल अधिकाऱ्यांनी तो दिल्लो आसतलो.
जिल्हो पंचायतींक येणावळीचे मार्ग दाखोवपाक मुखेल अधिकाऱ्यांनी कितलो वावर केला? दोनूय जिल्हो पंचायतींक पंचायतीं परस थिराय बरी मेळ्ळ्या. संगीत कदेलाचें राजकारण जिल्हो पांवड्यार तितलें दिसलें ना. जिल्हो पांवड्यार वांगडी आपआपल्या वाठारांनी कामां करून घेतात. अदमासपत्रकांत व्हड कामा पासत तजवीज नासता.
जिल्हो पंचायती पंचवीस वर्सांच्यो जाल्यो, तेन्ना तांकां अधिकार मेळप समा जातलें. सरकार ती संद घेतलें. राज्य वेंचणूक आयुक्त, एक सरकारी अधिकारी, अणभव खूब तेंपाचो. आपल्या अधिकारांची तांकां पुराय जाणविकाय आसा.
जिल्हो पंचायत वेंचणुकेंत पंचायत पांवड्या वयलेय वांगडी आसतले. वेंचणूक जिखल्यार पंचायत वांगडीपदाचो राजिनामो दिवन जिल्हो पंचायत वा पंचायत वांगडी म्हणून रावप हो निर्णय ते घेवंक शकतात. पांवड्यान जिल्हो उंचायेर अधिकार कित्याक उणें? अधिकारांची मोख वेंचणुकेंत देंवतल्यांनी दवरची.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
