भांगरभूंय | प्रतिनिधी
56 व्या इफ्फीचो समारोप; रजनीकांत हांचो केलो भोवमान
पणजी: 56 व्या आंतरराष्ट्रीय चित्रपट महोत्सवांत (इफ्फी) प्रतिश्ठेचो भांगरा मोर पुरस्कार ऍश मेफेयर दिग्दर्शीत ‘स्कीन ऑफ यूथ’ ह्या व्हिएतनाम, सिंगापूर आनी जपान ह्या तीन देशांची कलाकृती आशिल्ल्यान चित्रपटान मेळयलो. जाल्यार अंदूंचे ‘आयसीएफटी-युनेस्को गांधी’ पदक एरीक स्वेसन दिग्दर्शीत ‘सेफ हावस’ ह्या चित्रपटाक मेळ्ळो. सर्वोत्कृश्ठ वॅब सिरीज (ओटीटी) पुरस्कार बंदीश बँडीट 2 ह्या सिरीजान जिखलो. शुक्रारा इफ्फीचो समारोप सुवाळो बांबोळे डॉ. श्यामाप्रसाद मुखर्जी स्टेडियमार जालो. कार्यावळींत अभिनेते रजनीकांत हांकां सिनेमळार 50 वर्सां योगदान दिल्ले खातीर तांचो भोवमान केलो.
ह्या वेळार मुख्यमंत्री डॉ. प्रमोद सावंत, केंद्रीय म्हायती आनी प्रसारण खात्याचे राज्यमंत्री एल मुरुगन, शेखर कपूर, सचीव संजय जाझू, अभिनेते ऋषभ शेट्टी, नवाजुद्दीन सिद्दिकी, रणवीर सिंग हांचे सयत सिनेमळा वेले हेर कलाकार हाजीर आशिल्ले.
कार्यावळीचें सुत्रसंचालन जय भानुशाली आनी तिस्का चोप्रा हांणी केलें. कार्यावळींत ईशान्ये कडलीं राज्यां तशेंच कर्नाटकांतली प्राचीन नृत्यकला सादर केली.
सुरवातेक दिव्यांग वांगडी आशिल्ल्या कला मंडळाच्या गणेश वंदनान हाजीर आशिल्ल्यांचीं मनां जिखून घेतलीं. कार्यावळींत किरण शांताराम, रमेश सिप्पी आनी नवाजुद्दीन सिद्दिकी हांकां लेगीत भोवमानीत केलें.
मुख्यमंत्री डॉ. प्रमोद सावंत हांणी म्हणलें, इफ्फी ही कल्पक मनांचो महोत्सव आसा. दरवर्सा इफ्फी आयोजीत करपाचो आमकां अभिमान आसा. फाटल्या कांय वर्सांत थळावे चित्रपट निर्माते गोंयांत चित्रीकरणाक प्राधान्य दीत आसात. विदेशी चित्रपट निर्मात्यांनी लेगीत गोंयांत येवन चित्रीकरण करचें. आमकां गोंयाक चित्रपट निर्मितीचें हब करपाचें आसा. संवसाभरांतल्या चित्रपट निर्मात्यांनी चित्रीकरणा खातीर गोंयाक प्राधान्य दिवचें अशी आमची अपेक्षा आसा. संवसारभरांतली कल्पक व्यक्ती, कलाकार, कथा सांगप्यांक गोंयांत सदांच येवकार आसा.
केंद्रीय राज्यमंत्री एल मुरुगन हांणी म्हणलें, आमी इफ्फींत दरवर्सा नव्यो नव्यो गजाली हाडपाचो येत्न करीत आसतात. ते प्रमाण अंदूं इफ्फीचें उक्तावण उक्त्या प्राकारांत केलें. इफ्फी थळाव्या कलाकारांक, चित्रपट निर्मात्यांक आंतरराष्ट्रीय पांवड्यार संदी उपलब्ध करून दिता. अंदूंच्या फिल्म बाजारांत 1050 कोटी रुपयांचो वेवसाय जालो. भारताक कथाकथनाचो प्राचीन इतिहास आसा. इफ्फीच्या माध्यमांतल्यान आमी ह्याच इतिहासाक तंत्रिकतायेची जोड दिवपाचो येत्न करीत आसात.
फुडले 100 जल्म अभिनेतो जावपाचो आसा: रजनीकांत
रजनीकांत हांणी भोवमाना खातीर केंद्र सरकाराचे उपकार मानले. तांणी म्हणलें, हो पुरस्कार चित्रपटांत काम करपी सगल्यां खातीर आसा. हांव फाटलीं 50 वर्सां चित्रपटांत काम करीत आसलो तरी म्हाका तीं 10 ते 15 वर्सांच आसात अशें दिसता. फुडलो जल्म आसत जाल्यार फुडले 100 जल्म म्हाका अभिनेतो म्हणून, रजनीकांत म्हणून जल्म घेवपाचो आसा.
थळाव्यो कथा संवसारीक पांवड्यार व्हरपाचो यत्न: ऋषभ शेट्टी
–
अभिनेतो ऋषभ शेट्टी हांणी म्हणलें, कर्नाटकांत यक्षगाना हो एक प्राचीन कला प्रकार आसा. अभिनयाची सुरवात ह्याच कलाप्रकारांतल्यान जाली. आमच्या वाठारांत रामायण, महाभारत पूर्ण कथा ह्या कलेच्या माध्यमांतल्यान लोकां मदीं पावल्यो. चित्रपटाच्या माध्यमांतल्यान थळाव्यो कथा संवसारीक पांवड्यार व्हरपाचो म्हजो येत्न आसता.
भारतीय आंतरराष्ट्रीय चित्रपट महोत्सवांतले जैतीवंत
– सर्वोत्कृश्ठ चित्रपट: स्कीन ऑफ यूथ , व्हिएतनाम
– उत्कृश्ठ दिग्दर्शक: संतोष डावखर (गोंधळ)
– उत्कृश्ठ अभिनेतो: उबेमार रिओस (ए पोएट)
– उत्कृश्ठ अभिनेत्री: यारा सोफिया ऑस्तान (लिटील ट्रबल गर्ल्स)
– विशेश जुरी: अंकिनोला डेव्हीस ज्युनियर (माय फादर्स शॅडो)
– उत्कृश्ठ पदार्पण भारतीय दिग्दर्शक- करण सिंग त्यागी (केसरी चॅप्टर 2)
– उत्कृश्ठ पदार्पण दिग्दर्शक: हेसम फराहमंद
(माय डॉटर्स हेर) आनी टोनीस पील (फ्रँक).
– आयसीएफटी- युनेस्को गांधी पदक: सेफ हावस
– सर्वोत्कृश्ठ वॅब सिरीज: बंदीश बँडीट-2
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
