भांगरभूंय | प्रतिनिधी
भांगरभूंय । प्रतिनिधी
पणजीः सा-पेद्र ते दिवार हे मांडवी न्हंय मार्गाचेर बेगीनूच रो-रो फेरी धांवतली. सुमार 50 प्रवासी आनी 19 वाहनांची ताक आशिल्ली नवी रो रो फेरी बोट बांदपा खातीर न्हंय येरादारी खात्यान निविदा जारी केल्या. 6 म्हयन्यां भितर रो-रो फेरी ह्या मार्गार प्रवाशांचे सेवेक दाखल जातली. ही रो-रो फेरी बोट बिल्ड टु ऑपरेट ह्या तत्वाचेर बांदपा खातीर न्हंय येरादारी खात्यान निविदा जारी करून इत्सुक जहाज बांधणी कंपनी कडल्यान अर्ज मागयल्यात.
सा-पेद्र ते दिवाडे मार्गार दोन रो-रो फेरी येतल्यो. दर फेरी बोटीची 8 ते 9 दुचाकी, 20 मोटारी आनी 50 प्रवाशांक व्हरपाची तांक आसतली. ही फेरी बोट 24 वरां प्रवाशांचे सेवेत आसतली. जे अस्तिवात आशिल्ले फेरी बोटीचे धक्के आसात तांका समा आसपी हे रो रो फेरीचे दोनूय रॅम्प आसतले. सा-पेद्र आनी दिवाडी हांगासर अस्तिवांत आशिल्ले फेरी धक्को आनी फेरबोटी तशेंच उदकाची खोलाय आनी सुकतेचो अभ्यास करून रो रो फेरीचो डिजायन तयार करपाक सांगला.
ही फेरी बांदप, ती चलोवप, कर्मचारी नियुक्त करप हाचो सगळो खर्च कंपनीचो आसतलो. हे फेरीचे शुल्क एकठांय करपा खातीर न्हंय येरादारी खातें कंत्राटदार नियुक्त करतले. दर म्हयन्याचे शेवटांक खात्याचें वरीश्ठ अधिक्षकांन समाधानकारक सेवेचे प्रमाणपत्र दिले उपरांतच खातें कंपनीक म्हयन्याळे भाडे दितले आनी दर वर्सा ह्या भाड्यांत 5 टक्के वाड जातली. ह्या मार्गार ही फेरी सेवा 8 वर्साचे कंत्राटी पध्दतीचेर चलोवपाक दितले. जर खात्याक दिसता जाल्यार हो कंत्राट फुडली दोन वर्सा वाडोवन दितले. कंपनीक 180 दिसां भितर ही फेरी तयार करून सेवेत दाखल करची पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
