भांगरभूंय | प्रतिनिधी
भांगरभूंय । प्रतिनिधी
पणजीः गोंय गृहनिर्माण मंडळान कोलवाळे आनी हरवळ्यां मेळून दोन प्लॉट पावणेक काडल्यात. अजापाची गजाल म्हणल्यार ह्या दोनूय प्लॉटां खातीर फक्त मुळावी ठेव ही 2 ते 5 कोटी रुपया मेरेन आसा. ई-पावणे वरवीं ह्या दोनूय प्लॉटांची विक्री जातली, अशी कळोवणी गृहनिर्माण मंडळान दिल्या.
गोंय गृहनिर्माण मंडळान ई-पावणे वरवीं वेवसायीक प्लॉटांचे थेट विक्री खातीर ऑनलायन अर्ज मागयल्यात. गोवा ऑनलायन हे वेबसायटीक भेट दिवन इत्सुकांनी 1 डिसेंबर ते 22 डिसेंबर 2025 मेरेन अर्ज करचे. गोंय गृहनिर्माण मंडळाचे वेबसायटीचेर तपशीलवार कळोवणी उपलब्ध आसा.
हातूंत कोलवाळ बार्देस हांगासर सी 1 हो 35,200 चौ. मी प्लॉट उपलब्ध आसा. 200 एफएआर सयत ह्या प्लॉटाचे मुळावे मोल रु. 18,000 दर चौ. मी इतले आसा. ह्या प्लॉटा खातीर मुळावी ठेव रु. 5 कोटी आसा. जाल्यार रु. 5,900 जीएसटी सयत नोंदणी शुल्क आसा जे परत मेळचे ना. जाल्यार हातूंत हरवळ्यां-सांखळी हांगासर सेक्टर बी हो 3,828 चौ. मी प्लॉट उपलब्ध आसा. 100 एफएआर सयत ह्या प्लॉटाचे मुळावे मोल रु. 8,000 दर चौ. मी इतले आसा. ह्या प्लॉटा खातीर मुळावी ठेव रु. 1 कोटी आसा. जाल्यार रु. 5,900 जीएसटी सयत नोंदणी शुल्क आसा जे परत मेळचे ना.
ह्या दोनूय प्लॉटांची ई-पावणी जातली. जो मुळावे दरां परस चडांत चड बोली लायतलो ताका हे प्लॉट विकते घेवपाक मेळटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
