भांगरभूंय | प्रतिनिधी
फाल्यांच्यान जोडणी तोडपाची कारवाय सुरू जातली
भांगरभूंय । प्रतिनिधी
पणजी : अडचणीच्या सुवातेवेले वीज मीटर काडून ते सोयीच्या सुवातेर हाडपाच्या नोटिसीक फकत 35 टक्के वीज गिरायकांनी प्रतिसाद दिला. हाका लागून 65 टक्के गिरायकांचे मीटर घराच्या भीतर वा अडचणीच्या सुवातेर आसा. अडचणीच्या सुवातेवेल्या 12 हजार वीज मीटरांचे स्थलांतरण वीज गिरायकांनी केलां. नोटीशी प्रमाण स्थलांतरणाची मुजत शुक्रारा सोंपील्ल्यान फाल्यां शेनवार सावन कारवाय सुरू जातली, अशी म्हायती वीज खात्याचें अधीक्षक अभियंते मयूर हेदे हांणी दिली.
अडचणीच्या सुवातेर 38 हजार घरगुती वीज मीटर आशिल्ल्याची म्हायती खात्या कडेन आसा. हाचे मदले 12 हजार मीटरांचे स्थलांतरण जालां. जे कोणें स्थलांतरण करूंक ना, तांची वीज जोडणी तोडपाची कारवाय सुरू जातली, अशें अधीक्षक अभियंते मयूर हेदे हांणी सांगलें.
काय जाणांचे वीज मीटर घरांत भीतर आसा. मीटर रीडर बीलां खातीर रीडींग घेवपाक येता तेन्ना घर बंद आसता. हाका लागून तांकां रीडींगा खातीर फावटी मारच्यो पडटा. काय वेळार मीटर बरोच उंच आसता. हाका लागून रीडींग सारके घेवपाक मेळना. हाका लागून वीज खात्यान मे म्हयन्यांत वीज मीटर स्थलांतरीत करपाची नोटीस गिरायकांक दिल्ली. मीटराचे स्थलांतरण करपा खातीर 6 म्हयन्यांची मुजत आयज 28 नोव्हेंबराक सोंपता. त्या, त्या विभागाचे अभियंते नोटीशी प्रमाण कारवाय सुरू करतले, अशी म्हायती अधीक्षक अभियंते मयूर हेदे हांणी दिली. हाचे पयली लेगीत खात्यान बरेच खेपो नोटिशी दिल्या वा तांका कळीत केला. हाका लागून आतां कारवाय करपा बगर हेर पर्याय ना, अशें अभियंत्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
