भांगरभूंय | प्रतिनिधी
काणकोण: श्रीसंस्थान गोकर्ण पर्तगाळी जीवोत्तम मठांत डिजिटल कनेक्टिव्हिटी आनी सुरक्षा वाडोवपा खातीर म्हायती तंत्रज्ञान, इलॅक्ट्रॉनिक्स आनी कम्युनिकेशन विभाग (डीआयटीईएण्डसी) आनी इन्फोटेक कॉर्पोरेशन ऑफ गोवा (आयटीजी) हांच्या सहकार्यान एक व्हड उपक्रम चालीक लायलां. मठांच्या वठारांत 100 परस चड वायफाय अॅक्सेस पॉयंट आनी 200 परस चड सीसीटीव्ही कॅमेरे बसयल्यात. जाका लागून पुराय वाठारांची डिजिटल मुळावी बांदावळ खूब घटमूट जाल्या. बिरेस्तारा 27 नोव्हेंबराक हो उपक्रम औपचारीकपणान सुरू जालो.
ह्या सुवाळ्याचें उक्तावण विद्याधीश तीर्थ श्रीपाद वडेर स्वामी, तशेंच पर्यटन मंत्री रोहन खंवटे, आयटीजीचे अध्यक्ष डॉ. चंद्रकांत शेट्ये, डीआयटीईएण्डसी संचालक कबीर शिरगांवकार, आयटीजीचे वेवस्थापकीय संचालक प्रविण वळवटकार आनी मध्यवर्ती समिती आनी सार्ध पंचशतमानोत्सव समितीचे अध्यक्ष श्रीनिवास शेणवी धेंपो हांच्या हाजिरेंत जालें.
मुख्यमंत्री डॉ. प्रमोद सावंत हांच्या फुडारपणा खाला चालीक लायिल्लो हो उपक्रम गोंयची डिजिटल यंत्रणेला घटमूट करपाच्या सरकाराच्या हेतूचेर भर दिता.
जियो आनी बीएसएनएलाचें 5जी नेटवर्क काणकोण वाठारांत पयलींच उपलब्ध आशिल्लें. आतां एअरटेल (इंडस टॉवर्स) नेटवर्क जोडून मठ वाठारांतल्या मोबायल नेटवर्कांत आनीक सुदारणा जाल्या. हांगा वाडत वचपी भक्त आनी पर्यटकांची गरज लक्षांत घेवन हो वाठार म्हत्वाचें आध्यात्मिक केंद्र म्हणून विकसीत जायत आसा.
सुवाळ्या आदीं सगळ्यो डिजिटल सुविधा दिल्ले खातीर गोंय सरकार आनी मंत्री रोहन खंवटे हांचे हांव उपकार मानतां. गांवगिऱ्या वाठारांनी अशी डिजिटल सुविधा आसप खूब फायदेशीर आसा आनी मठांक आनी थळाव्या समाजाक व्हड आदार आसा अशें परमपूज्य स्वामीजीन म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
