भांगरभूंय | प्रतिनिधी
पणजीः बंदी आशिल्ल्या एलईडी नुस्तेंमारी उपकरणांचो वापर करून महाराष्ट्राच्या दर्या शिमेचेर बेकायदेशीर नुस्तेंमारी केल्ले खातीर महाराष्ट्र नुस्तेंमारी खात्याच्या अधिकाऱ्यांनी गोंयांतले दोन नुस्तेंमारी ट्रॉलर जप्त केल्यात.
मेळिल्ले म्हायती प्रमाण, जप्त केल्लें दोन ट्रॉलर बार्देशांतल्या आमदाराच्या मालकीचें आशिल्ल्याचें कळटा. थळाव्या नेमाचें उल्लंघन केल्ल्यान, खास करून दर्यांतल्या जिवाक धोको निर्माण करपी एलईडी गियर वापरपा खातीर ही कारवाय केल्या.
मजगतीं, गोंयच्या वाठारांत बेकायदेशीर नुस्तेंमारी करपी लोकां आड गोंय नुस्तेंमारी खात्यान खर कारवाय केल्ली. हालींच गोंय नुस्तेंमारी खात्यान आनी दर्यादेगेवेल्या पुलिसांनी संयुक्त कारवाय करून महाराष्ट्र (रत्नागिरी) आनी कर्नाटकांतल्यान वट्ट 16 बेकायदेशीर नुस्तेंमारी ट्रॉलर जप्त केल्लें. तातूंतले रत्नागिरीचे 10 ट्रॉलर कळंगूटे लागसार जाल्ले कारवायेंत जप्त केल्लें.
त्या वेळार कायद्याचें उल्लंघन करपी लोकांचेर खर कारवाय करतले अशें नुस्तेंमारी मंत्री हळर्णकर हांणी परतून सांगिल्लें. जप्त केल्लें हें ट्रॉलर फुडले कारवाय करपा खातीर पणजी नुस्तेंमारी खात्याच्या जेटींत हाडलें. गोंयान महाराष्ट्रांतल्या ट्रॉलरांचेर कारवाय केली जाल्यार आतां महाराष्ट्रान गोंयच्या ट्रॉलराचेर कारवाय केल्या. जाका लागून दोनूय राज्यांच्या वेपाऱ्यां मदीं तणाव निर्माण जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
