भांगरभूंय | प्रतिनिधी
कॉंग्रेशीच्या शिष्टमंडळाचो विद्यूत भवनाचेर घेराव
पणजीः फाल्यां मेरेन लायटीचे मीटर घरा भायर घाला ही वीज खात्यान काडिल्ली नोटीस नागरीकांची गैरसोय करपी आसा. हे वीज मिटर घरा भायर कित्याक बसोवपाक सोदतात असो प्रस्न केल्यार हे विशीं वीज खात्याच्या अधिकार्यांकडेन धड स्पश्टीकरण ना. वीज खात्यान हो निर्णय फाटीं घेवचो, अशी मागणी गोंय कॉंग्रेशीचे प्रदेशाध्यक्ष अमित पाटकार हांणी केली.
पाटकार हांच्या फुडारपणा खाला कॉंग्रेशीच्या शिश्टमंडळान पणजे विद्युत भवनांत वीज अभियंत्याक घेराव घालून जाप विचारली. हे वेळार व्हडा संख्येन कॉंग्रेसीचे वावुरपी हजर आसले.
मुखेल वीज अभियंते प्रधानमंत्र्याच्या भेटीक लागून व्यस्त आसात अशें सागूंन ते आमकां मेळूंक ना देखून आमी कार्यकारी अभियंत्याची भेट घेतली. प्रधानमंत्री काणकोण येतात. मात मुखेल वीज अभियंतो पणजे कित्याक व्यस्त आसा, असल्यांनी हे खात्यांचे पाड घालतले, असो आरोप पाटकार हांणी केलो.
वीज खात्यान आपल्या नोटीसेंत गिरायकांक २८ नोव्हेंबर मेरेन सगळे मिटर घरा भायर घालचे अशें सांगलां. मात प्रत्यक्षांत ही नोटीस कोफुसांव करपी आसा. घरा समज मिटर वण्टीचेर आसा आनी घर आनी दुरीग हाचे मदी १५ मिटर अंतर आसा. मात आतां नोटीसेंत हो मिटर काडून दुर्गाचेर बसोवपाक सांगता, असो दावो पाटकार हांणी केलो.
हे मीटर भायर हाडपा फाटल्या कारणां विचारलीं तेन्ना अभियंत्यान सांगलें, आपतकालीन वेळांत हो मिटर सुलभ आसपाक जाय. फाल्यां सकाळीं उजो लागलो वा शोर्ट सर्कीट जालें एमसीबी बंद करपाक जाय. मात उजो जर लागलो वीज खातें निमणें आनी उजो पलोवपी दळ पयलें आसतलें. हे तर्क म्हाका समजना, अशें पाटकार हांणी सांगलें.
दुसरें कारण मीटर छेडछाडीचें दिले. गोंयां भितर आसपी कितल्याशाच मिटरांक सील मारिल्लें आसात. देखून हांचेकडेन छेडछाड कशी जातली. जर छेडछाड जाता आसत ह्या मीटराची डिजायन चुकीची आसा. जर मीटर भायर बसयले जाल्यार हाचेकडेन छेडाछाड परत जावची ना हाची हमी सरकार दिता काय, असो प्रस्न पाटकार हांणी विचारलो.
जे लोक बीलां भरिनात तांची जोडणी कातरपाक अडचण जाता हें तिसरें कारण दिलां. जर गोंयकार म्हयन्याचें बील फारीक करना तांची लायट कातरपाक ते सदांच फुडें. मात तांची स्वताचीं खातीं वर्स भर बिलां भरिनात आनी ३०० कोटीचे थकबाकी आसा ती वसूल करपाक हांचेकडेन कापास्दाद ना, असो आरोप पाटकार हांणी केलो.
मिटर स्थलांतर करपाक अपयेसी थारले जाल्यार लायन कापतले आनी हो विशय सुटावो जाय मेरेन तो तसोच दवरतले. जर तुमचू सासणा खातीर जोडणी काडटा जाल्यार ही जोडणी परत मेळची. तुमकां सगळ्या खात्यांचे सोपस्कार पुराय केले उपरांतच नवीन जोडणेक अर्ज करून मिटर बसोवचो पडटलो, अशी शिटकावणी नोटीसेंत दिल्या. गोंयकारांच्यो लायनी कट करपाक वीज खातें कारणां सोदतात हें हाचे वयल्यानूच सिध्द जाता, असोय आरोप पाटकार हांणी केला.
आमचे कितें मुद्दे आसात ते निवेदनांत घालू दिवपाक सांगलां आनी मुखेल अभियंत्या कडे चर्चा करून हे विशींचो निर्णय कळयतले, अशें आमका अभियंत्यान कळ्ळां. हाचे वेल्यान सिध्द जाता की हांकांच खबर ना खंयचे दिखेन वयता तें. आमचे कडेन निवेदन मागचे परस तुमकां हे विशींचे गिन्यान आसपाक जाय आसले, असो थोमणो पाटकार हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
