भांगरभूंय | प्रतिनिधी
पणजी : राज्यांतल्या दिव्यांग विद्यार्थ्यांक आतां इंदिरा गांधी राष्ट्रीय मुक्त विद्यापीठांतल्यान (इग्नू) दूरस्थ पद्धतीन उच्च शिक्षण घेवपाक मेळटलें. हे विशीं राज्य दिव्यांगजन आयुक्त कार्यालय, दिव्यांगजन सक्षमीकरण खातें आनी पणजी हांगच्या इग्नू प्रादेशीक केंद्रांनी सामंजस्य करार केला. हाका लागून गोंयांत बारावेचें शिक्षण पुराय केल्ल्या, मात विवीध आव्हानांक लागून फुडलें शिक्षण चालूच दवरपाक मेळनाशिल्ल्या दिव्यांग विद्यार्थांक फायदो जातलो.
करारा प्रमाण अशा विद्यार्थ्यांक इग्नू वरवीं चलोवपी विवीध प्रमाणपत्र, पद्विका, पद्वीपूर्व आनी पद्व्युत्तर अभ्यासक्रमां खातीर प्रवेश घेवपाक मार्गदर्शन आनी मजत मेळटली. हे सुविधायेक लागून ह्याा विद्यार्थ्यांक घरांतल्यानूच अभ्यासक्रम पुराय करप शक्य जातलें. इग्नूचे अधिकारी विद्यार्थ्यांक प्रवेश प्रक्रिया आनी उपलब्ध कार्यावळ समजून घेवपाक मजत करतले. तशेंच मार्गदर्शन सत्रांचेंय आयोजन करतले.
हे विशीं दिव्यांगजन आयुक्त गुरुप्रसाद पावसकार हांणी सांगलें, इग्नू वांगडाची ही भागीदारी गोंयच्या दरेका दिव्यांग मनशा खातीर उच्च शिक्षण सर्वसमावेशक आनी सुलभ करपाचे दिकेन एक म्हत्वाचें पावल आसा. खुबश्या विद्यार्थ्यांनी तांचे अडचणींक लागून बारावे उपरांतचें शिक्षण बंद केलां. आतां ह्या सहकार्याक लागून विद्यार्थ्यांक आपलें उच्च शिक्षण सुरू दवरपाची, ध्येय साध्य करपाची आनी अर्थपूर्ण करिअर घडोवपाची नवी संद मेळटली.
आमचें कार्यालय दरेका पात्र विद्यार्थ्याक मार्गदर्शन करतलें आनी गरजेच्या प्रक्रियां वरवीं तांकां फाटबळ दितले. तशेंच पात्र विद्यार्थी दिव्यांगजन सक्षमीकरण खात्याच्या विवीध शिश्यवृत्तीचो लाव घेवपाक शकतले. नांव नोंदणी करपाक इत्सूक आशिल्ल्यान वा मजतीची गरज आशिल्ल्या दिव्यांग विद्यार्थ्यांनी
महादेव सावंत (९६३७८८८७६९/ ९१५६३२१९००) हांचे कडेन वा comm.goagov.in वा rcpanajiignou.ac.in हांगा संपर्क करचो असो उलो पावसकार हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
