भांगरभूंय | प्रतिनिधी
पणजी : हेर राज्यांतल्यान गोंयांत येवन नुस्तेंमारी करपाच्या नुस्तेंमार्यांच्या वाडपी कागाळींवेल्यान नुस्तें खातें शिटूक जालां. कळंगुटे बेकायदेशीरपणान नुस्तेंमारी करपी महाराष्ट्रांतले १० ट्रॉलर धरले. दर्यादेगेवेल्या पुलिसांचे मजतीन मत्स्य खात्यान ही कारवाय केली.
बेकायदेशीर नुस्तेंमारीचेर कारवाय करतना, गोंय नुस्तें वेवसाय विभागान बुधवारा कळंगूटे दर्यादेगेर महाराष्ट्र नोंदणीकृत १० ट्रॉलर जप्त केल्ल्याची म्हायती नुस्तें खात्या वतीन दिली. गोंयांत येवन नुस्तेंमारी करीत राज्यांतले नेम आनी दर्यांतल्यो शिमो हुपिल्ल्या प्रकरणांत ही कारवाय केली.
हे विशीं म्हायती दितना नुस्तें खात्याचे मंत्री निळकंठ हळर्णकार हांणी सांगलें, थळावी उपजीविका आनी दर्याच्या पर्यावरणाक धोको निर्माण करपी बेकायदेशीर नुस्तेंमारीक आळो घालपा खातीर सरकार कटिबद्ध आसा. कारवाय चालूच उरतली आनी कायद्या प्रमाण बेकायदेशीर नुस्तेंमारी करपी ट्रॉलर्सचेर खर कारवाय करतले अशें सांगलें.
दर्यादेगेवेल्या हालचालींचेर नुस्त्या खात्याचें लक्ष आशिल्ल्यान नदर दवरपा खातीर गोंय दर्यादेेग पुलिसांची मजत घेतात. गोंयां भायल्यान येवन करपी नुस्तेंमारीक लागून वेवसायाचेर परिणाम जाता अश्यो थळाव्या नुस्तेंमार्यांच्यो वाडपी कागाळी आशिल्ल्यो.
ताची दखल घेवन कारवाय करीत ट्रॉलर्स जप्त केली. हाका लागून कारवाय केल्ल्याचो स्पश्ट संदेश वतलो अशें तांणी सांगलें. घुसखोरीक लागून फकत नुस्तें संसाधनाचेरूच परिणाम जायना, जाल्यार हांगच्या परंपरीक नुस्तेंमार्यांक फटको बसता अशें नुस्तेंमार्यांचें म्हणणें आसा.
अधिकार्यांनी दर्यादेगांचेर देखरेख वाडयल्या. गस्त घालपी बोटी तैनात केल्यात आनी नुस्तें विभाग आनी दर्यादेग पुलिसां मदलो समन्वय वाडोवपाचेर भर दिल्या. ही कारवाय गोंयच्या सागरी संसाधनांची राखण करपा खातीर आनी थळावे नुस्तेंमारी समुदायांच्या हिताची राखण करपा खातीर चलोवपी एक आशिल्ल्याचें मंत्री हळर्णकार हांणी म्हणलें.
नुस्तेंमारी नेम मोडप्यांक दंड करतले आनी परवाने रद्द करपी हाचे सयत कायदेशीर कारवाय करतले अशें तांणी स्पश्ट केलें. आमी गोंयच्या नुस्तेंमार्यांच्या हक्काची राखण करपाचो सोपूत घेतला, अशें हळर्णकार हांणी म्हणलें. फाटल्या दोन म्हयन्यांत कर्नाटकांतल्यो ५ नुस्तेंमारी ट्रॉलर्स जप्त केल्ल्यो.
नुस्तें विभागान नुस्तेंमार्यांक दुबावी हालचालींची कागाळ करपाचो उलो मारलो आनी रोखडीच कारवाय करपाचें आस्वासन दिलां अशें मंत्री हळर्णकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
