भांगरभूंय | प्रतिनिधी
वास्को: बायणा दरोड्यांतल्या दरोडेखोरांक फकत आठ दिसांनी मुरगांव पुलिसांनी धरले, हे खातीर सागर नायक हांणी खोस उक्तायली. गोंय पुलिसांचे कामगिरीचेर आपलो १०१ टक्के विस्वास आशिल्लो. तशेंच ह्या प्रकरणाचो छडो लागपाक स- सात म्हयने लागतले अशें दिसतालें. इतले बेगीन छडो लायिल्ले खातीर पुलिसांची तोखणाय करीन दिसता अशें नायक हांणी म्हणलें. ह्या दरोड्याच्या प्रकरणांत पुलिसांनी मुळचे ओडिशाचे आशिल्ले स जाणांक बंगळुरू अटक केली. तांचे कडल्यान कांय सामान जप्त केलां. हातूंत चामुंडी आर्केड इमारती लागसार भेळपुरी, पाणीपुरीची हातगाडी लावपी मुखेल सुत्रधाराचो आसपाव आशिल्ल्याचें समजता.
सवे माळयेर रावपी सागर नायक हांच्या फ्लॅटार सात-आठ जाणांनी दरोडो घाल्लो. फकत तीस चाळीस मिनटांनी पुराय फ्लॅट लूटून इमारतीच्या फाटल्या दारांतल्यान पळ काडिल्लो. तांणी हॅल्मेट आनी मास्क बांदिल्ल्यान तांची वळख पटप कठीण आशिल्लें. पुलिसांनी आपले तरेन तपास सुरू केलो.कांय लोकांनी पुलिसांचे कामगिरीचेर प्रस्नूय उबारले.
बंगळुरू हांगा स जाणांक ताब्यांत घेवन चोरून व्हेल्ल्या सामानां मदलें चडशें सामान हस्तगत केल्ल्याची म्हायती सागर नायक हांकां मेळ्ळे उपरांत तांणी खोस उक्तायली.
सागर नायक हांणी सांगलें, पुलिसांच्या कामाचेर म्हजो विस्वास आशिल्लो. कांय जाण म्हजे कडेन येवन पुलिसांचे कामगिरी विशीं प्रस्न हाजीर करताले. मुरगांव पुलीस निरीक्षक जॅकीस शेरीप, उपअधीक्षक गुरुदास कदम हे सेगीत संपर्कांत आशिल्ले. ते म्हजे कडेन कामाक आशिल्ल्या कामगारांची म्हायती घेताले. ते हेर फोटोय दाखोवन हांगा वळखता काय विचारताले. ते योग्य तरेन तपास करतात हे विशीं हांव निश्चीत आशिल्लों. मुरगांव पुलिसांनी एक ब्लायंड केस योग्य तरेन अभ्यास करून धसास लायिल्ल्यान खोस भोगता. ह्या प्रकरणांत मुख्यमंत्री डॉ. सावंत, पुलीस महासंचालक, महानिरीक्षक उपमहानिरीक्षक, दक्षिण गोंयचे अधीक्षक, वास्कोचे उपअधीक्षक गुरुदास कदम, निरीक्षक वैभव नायक, निरीक्षक जॅकीस शेरीफ आनी हेर पुलिसांचे उपकार मानतां अशें तांणी सांगलें.
मजगतीं, निरीक्षक शेरीफ हांणी सागर नायक हांच्या कुटूंबियांची भेट घेतली. ह्या वेळार सागर नायक हांणी तांकां परबीं भेटयलीं. शेरीफ हांणी ह्या प्रकरणाचो छडो लावपाक आमी खूब मेहनत घेतली. जे मेहनत करतात तांकां येस मेळटा अशें सांगलें. पुलीस पंगड गोंयां भायर हेर राज्यांनी गेल्ले. पुलिसां विशीं कांय लोक जायतें उलयताले. तांच्या उलोवपा कडेन आमी आडनदर करून काम करीत गेेले. जर आमी ह्या प्रकरणाची म्हायती दितूच राविल्ले जाल्यार दरोडेखोरांक तपासाची सगली म्हायती मेळपाची अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
