भांगरभूंय | प्रतिनिधी
पणजी : ज्येश्ठ साहित्यकार महाबळेश्वर सैल हांकां कुवेंपु राष्ट्रीय पुरस्कार जाहीर जाला. कुवेम्पू राष्ट्रीय पुरस्कार निवड समितीचे बसकेंत हो निर्णय जाला. कुवेंपु प्रतिश्ठानाचे अध्यक्ष डॉ. बी. एल. शंकर हांचे अध्यक्षते खाला ही बसका जाली. ५ लाख रुपया आनी रुप्या पदक अशें ह्या पुरस्काराचें स्वरुप आसा. पुरस्कार भेटोवपाचो सुवाळो कुवेंपु हांच्या जल्मदिसाक २९ डिसेंबराक कुप्पली शारांत जातलो.
कुप्पाळी वेंकटप्पा पुट्टप्पा उर्फ कुवेंपु हे ज्ञानपीठ, पद्मविभूषण मेळिल्ले म्हान कन्नड कवी, नाटककार. २९ डिसेंबर १९०४ ते ११ नोव्हेंबर १९९४ हो तांचो काळ.
सैल हे गोंयचे नामनेचे कोंकणी लेखक. तांणी आपल्या कादंबरींनी कोंकणी साहित्य गिरेस्त केलां. तांणी भारतीय साहित्यांत व्हड योगदान दिलां. तांची एकमतान ह्या पुरस्कारा खातीर निवड जाली. सैल हे लश्करांत आशिल्ले. १९६५ वर्सा तांणी भारत- पाकिस्तान झुजांत वांटो घेतिल्लो. १९६४-१९६५ मजगतीं ते इझ्राएल इजिप्त शिमेचेर संयुक्त राश्ट्रांच्या शांतताय राखण दळांतय आशिल्ले. लश्करी सेवे उपरांत तांणी निवृत्ती मेरेन टपाल खात्यांत काम केलें. तांकां केंद्रीय साहित्य अकादेमीचो पुरस्कार मेळ्ळा. तशेंच ‘हांवठण’हे कादंबरी खातीर प्रतिश्ठीत सरस्वती सम्मान (२०१६) मेळ्ळा.
महाबळेश्वर सैल हांचे विशीं
महाबळेश्वर सैल हांचो जल्म उत्तर कन्नड जिल्ह्यांतल्या माजाळी वाठारांतल्या शेजेबाग गांवांत ४ ऑगस्ट १९४३ दिसा जालो. तरणेपणार ते लश्करांत गेले. १९६६ मेरेन तांणी थंय काम केलें. मागीर रान खात्यांत सुपरवायझर आनी २००३ वर्सा निवृत्त जाय मेरेन पोस्टांत काम केलें. ताचे पयलीं ते गोंय पुलिशेंत आशिल्ले. तांणी पलतडचो मनीस, हांवठण, तरंगां, युगसांवार, विखार विळखो अशीं साबार पुस्तकां बरयल्यांत. तीं इंग्लीशी सयत साबार भाशांनी अणकारीत जाल्यांत. तांकां विवीध राज्य, राष्ट्रीय पुरस्कार मेळ्ळ्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
