भांगरभूंय | प्रतिनिधी
नायक कुटुंबा सयत मुरगावच्या लोकांक मेळ्ळी थाकाय
पणजी : कसलीच खूण वा धागोदोरो नासतना लेगीत पुलिसांनी बायणा दरोड्याचो तपास केलो. देखून नायक कुटुंबा सयत मुरगांवच्या सगल्लोया कांक थाकाय मेळ्ळ्या, अशें आमदार संकल्प आमोणकार हांणी म्हणलां.
कसलोच धागोदोरो (क्लू) वा खूण दरोडेखोरांनी दवरूंक नाशिल्ल्यान तपास लागचोच ना, असो अदमास आशिल्लो. तरी लेगीत दुबावितांक अटक जाली, हे खातीर पुलीस निरीक्षक, पुलीस उपअधीक्षक हांका हांव मना काळजा सावन परबी भेटयतां, अशें संकल्प आमोणकार हांणी म्हणलां. चोरिल्लें भांगर लेगीत कांय प्रमाणात पुलिसांनी ताब्यांत घेतलां.
बायणा दरोड्या विशीं तेच इमारतींत रावपी एका थळाव्यान हेर दरोडेखोरांक म्हायती दिल्ली. तो ओडिशांत आसा. दरोड्यांत वट्ट ८ जाण आसात. ६ जाणांक अटक जाल्या, अशें तांणी सांगलें. दुबावितांक गोंयांत हाडले उपरांत सगळो कट उक्तो जातलो, अशें तांणी सांगलें.
कांय विरोधक पुलिसां सयत आमदार म्हूण म्हाका लेगीत दोश दिताले. आमदार कांयच करूंक शकना. पुलिसांनी तपास लावन बरी कामगिरी केल्या, अशें तांणी सांगलें.
पुलीस म्हासंचालक पुराय म्हायती दितले: मुख्यमंत्री
मजगतीं, हे विशीं उलयतना मुख्यमंत्री डॉ. प्रमोद सावंत हांणी सांगलें, बायणा दरोड्यांतल्या दरोडेखोरांक पुलिसांनी अटक केल्या. तांकां गोंयांत हाडले उपरांत पुलीस म्हासंचालक पुराय म्हायती पत्रकार परिशद घेवन दितले अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
