भांगरभूंय | प्रतिनिधी
पणजी : श्री संस्थान गोकर्ण पर्तगाळी जीवोत्तम मठाक ५५० वर्सां पुराय जाल्ले निमतान (सार्ध पंचशतमहोत्सव) २८ नोव्हेंबराक प्रधानमंत्री नरेंद्र मोदींच्या हस्तुकीं दक्षीण आशियांतल्या सगल्यांत व्हड रामाच्या पुतळ्याचें उक्तावण जातलें, अशीं म्हायती मठ केंद्रीय समितीचे अध्यक्ष श्रीनिवास धेंपो हांणी दिली. बुधवारा पणजे जाल्ले पत्रकार परिशदेंत ते उलयताले. ह्या वेळार भौशीक बांदकाम मंत्री दिगंबर कामत, अनिल पै, प्रवास नायक आनी शिवानंद साळगांवकार हाजीर आशिल्ले.
धेंपो हांणी सांगलें, रामाचो ब्रॉंझचो पुतळो ७७ फूट आसा. तो तमिळनाडूच्या एका शिल्पकारान केला. अनावरण सुवाळ्या उपरांत प्रधानमंत्री मोदी देवदर्शन करतले. उपरांत सभा जातली. हे कार्यावळीक १२ हजार लोकांची बसपाची वेवस्था केल्या. उक्तावण सुवाळ्यांत टपाल खात्या वतीन काडिल्ल्या विशेश तिकेटींचें आनी अर्थ खात्या वतीन काडिल्ल्या विशेश नाण्याचेंय अनावरण जातलें.
२७ नोव्हेंबर ते ७ डिसेंबर मजगतीं विवीध धर्मीक, सांस्कृतीक, समाजीक कार्यावळींचें आयोजन केलां. दर दिसा साधारणपणान १० हजार लोक हांगा भेट दितले अशी आमची अपेक्षा आसा. सांस्कृतीक कार्यावळींत थळाव्यां सयत देशभरचे नामनेचे कलाकार आपली कला सादर करतले. हातूंत अनुप जलोटा, शंकर महादेवन, अमृता शेणाॅय, महेश काळे आनी हेरांचो आसपाव आसा. गोंयकारांनी हे कार्यावळीचो लाव घेवचो असो उलो धेंपो हांणी मारलो.
दिगंबर कामत हांणी म्हणलें, मठ ५५० वर्सां पुराय करता ही खूब म्हत्वाची गजाल. हो मठ समेस्त गोंयकारांचो अभिमान जावन आसा. हातुंतलोच एक भाग म्हणून ५५० कोटी राम नाम जप जपपाची कार्यावळ आयोजीत केल्ली. हाका गोंयां सयत पुराय देशांतल्यान बरो प्रतिसाद मेळ्ळो. तशेंच हांगा धा दिसांनी ५५० हवनां करतले. केंद्र सरकार पर्यटन चालीक लायता. पर्तगाळी मठाचो पर्यटकांनीय अणभव घेवचो.
बेगीनूच रामायण थीम पार्क
मठ वाठारांत फुडल्या दोन म्हयन्यांनी रामायणाचेर आदारीत थीम पार्क, १० हजार चौमी सुवातेर म्युझियम, उजवाड आनी आवाजाचो शो अश्यो जायत्यो गजाली सुरू करतले. हाका लागून हो मठ पर्यटनाचेंय आकर्शण जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
