भांगरभूंय | प्रतिनिधी
वास्को : गोंयच्या बायणा, वास्कोच्या सागर नायक ह्या वेवसायीकाच्या फ्लॅटाचेर फाटल्या कांय दिसां सावन पडिल्ल्या सशस्त्र दरोड्या उपरांत हांगचो कायदो आनी सुवेवस्थेचो प्रस्न मुखार आयला. पुलिसांच्या तपासाचे नदरेन म्हत्वाच्या आशिल्ले हांगचे सीसीटीव्ही कॅमेर्यांचे जाल्ले बाबत अवस्थेचेरूय उजेड पडलो.
फाटल्या धा वर्सा परस चड काळ वास्कोचीं सीसीटीव्ही कॅमेरे यंत्रणांच बंद आसात. ताचो फायदो घेवन हांगा गुन्यांव वाडतूच आसात अशें पुलीस अधिकारी आनी थळाव्यांचें म्हणणें आसा.
२०१३ वर्सा खासदार निधींतल्यान बसयिल्ले ५२ सीसीटीव्ही कॅमेर्यांचो बरे तरेन सांबाळ जावंक नाशिल्ल्यान ते मोडल्यात. वास्को शारांतल्या मोक्याच्या जंक्शनार लायटीच्या खांब्यार बसयिल्ले हे कॅमेरे सध्या सोबेच्यो वस्तू जाल्यात. ह्या कॅमेर्यांत कितेंच शूट जायना. हाका लागून ताचो कितेंच फायदो जायना अशें मत थळाव्यांनी उक्तायलां.
वास्को सारकिल्ल्या बंदरआशिल्ल्या शारांत घटमूट सीसीटीव्ही यंत्रणां आसप म्हत्वाचें आशिल्ल्याचें पुलिसांचें म्हणणें आसा. घडपी गुन्यांव, अपघात, घर, दुकाना फोडप, दरोडे अश्या गुन्यांवांचो तपास लावपा खातीर सीसीटीव्ही यंत्रणा मजत थारता.
तशेंच सुरळीत येरादारी खातीरूय हे कॅमेरे गरजेचे अशें पुलिसांनी सांगलें. ह्यान पयलीं सीसीटीव्ही कॅमेरेे सुरू आसतना ‘हिट अँड रन’सारकिल्ले तशेंच कांय गुन्यांवांचो तपास लावपाक कॅमेर्यांचे फुटेजीची मजत जाल्ली.
कॅमेर्यांत व्हिडियो आयिल्ल्यान गुन्यांवकार, नेम मोडून वाहना धांवडावपी, हांची वळख पटप शक्य जातालें. उपरांत फुडली कारवाय सोपें वतालें अशें पुलीस सुत्रांनी सांगलें.
कॅमेर्यांक लागून येरादारीचेर नदर
कॅमेरे येरादारी नेम मोडपी वाहन चालकांचे नदर दवरपाक गरजेचें. सीसीटीव्हीक लागून घरा मेरेन दंड पावपाच्या भंयान वाहन चालक वेवस्थीत वाहनां चलयतात आनी हाका लागून अपघातांचेरूय नियंत्रण उरता अशें येरादारी पुलिसांनी सांगलें.
कॅमेरे दुरुस्त करपा खातीर जायते फावटीं सांगूनय नगरपालिका, प्रशासन हांणी हाचे कडेन लक्ष दिवंक नाशिल्ल्याचें सुत्रांनी सांगलें. सध्या, पुलीस तपासा खातीर खाजगी आस्थापनांच्या सीसीटीव्हीचो वापर करतात. मात, तातूंत मर्यादा आशिल्ल्यान वास्को शारांत सक्षम सीसीटीव्ही यंत्रणां कार्यान्वत करप हो ताचेर प्रभावी तोडगो आशिल्ल्याचें ह्या सुत्रांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
