भांगरभूंय | प्रतिनिधी
जिल्हो पंचायत वेंचणुकेंत विरोधकांचे ‘मिनी’ गठबंधन सामक्या निमाण्या खिणाक आकाराक आयलें जाल्यार तातूंतल्यान तांचो फायदोच जातलो अशें म्हणूंक येवचें ना.
बिहारांतले विधानसभा वेंचणुकेंत विरोधी महागठबंधन मातयेभरवण जालें. दोन अडेज म्हयन्यां पयलीं सावन व्हड गाजोवाजो करून राहुल गांधी आनी तेजस्वी यादव हांचो ‘मतचोरी’चो बार सामको फुसको थारलो. महागठबंधनाच्या ताटांत अजून कितें वाडून दरलां हें येता तो काळूच थारायतलो. बिहार वेंचणुकेंतले हारी उपरांत महागठबंधनाचे अस्तित्वूच घाताक आयिल्लें आसतना ह्या आघाडीतले कांय पक्ष गोंयांत ‘मिनी’ गठबंधन स्थापन करपाच्या कामांत सद्या व्यस्त आसात. राजकी पक्षां खातीर खूबच म्हत्वाच्या अशा पंचवर्सुकी परिक्षे आदींच्या परिक्षे खातीर एकठांय येवन ‘पेपर’ सोडोवपा खातीर हो आटाेपिटो आसा. वीस-पंचवीस दिसांनी जावपाची आशिल्ली जिल्हो पंचायत वेंचणूक म्हणल्यार सत्ताधारी भाजपा सयत सगल्याच पक्षां खातीर पंचवर्सुकी परिक्षे पयलींची परिक्षा आशिल्ल्यान दरेक पक्ष आपले परीन शक्य आसा तितले तांकीन प्रस्नपत्रिका सोडोवपाचो यत्न करप सभाविकूच आसा. पूण एकठांय येवन हे परिक्षेक बसत जाल्यार वर्स देडवर्सा उपरांत जावपी निमाणें परिक्षे खातीर शक्त आजमावप शक्य जातलें ह्या हावेसान हो खटाटोप चल्ला. निमाणें उद्दिश्ट एकूच तें म्हणल्यार सत्तेर आशिल्ल्या भारतीय जनता पक्षाक शह दिवप. ‘मिनी’ गठबंधनांत वांटेकार जावपाक अरविंद केजरीवाल हांच्या आम आदमी पक्षान आदींच न्हयकार दिल्ल्यान काँग्रेस, गोवा फॉरवर्ड आनी रेव्होल्युशनरी गोवन्स हांचे पुरतेंच ते मर्यादीत उरलां. अजापाची गजाल म्हणल्यार ह्या तीन पक्षां मदींय अजून तरी एकमत नाशिल्ल्यान प्रस्तावीत ‘मिनी’ गठबंधनूय बरेंच अडचणींत आयलां आनी ताचे फाटलें मुखेल कारण म्हणल्यार एकामेकां वेलो अविस्वास.
जिल्हो पंचायत वेंचणूक रोखडीच जावपाची आशिल्ल्यान ती एकठांय येवन लडोवप हे खातीर आतां मेरेन सुवातो वांटपाचेर सगले सोपस्कार पुराय जावप अपेक्षीत आशिल्लें. पूण खंयचे कितें प्रत्यक्ष युती पयलींच एकामेकांचेर कसो प्रभाव घालूंक येतलो हाचेरूच सगल्यांचो भर आशिल्ल्यान युतीचे वाटाघाटीत कसलीच प्रगती दिसून येना. काँग्रेस पक्षाचें ‘अंदर बाहर’ चालूच आसा. जाल्यार गोवा फॉरवर्डान युती जावचे पयलींच इजिदोर फर्नांडीस हांचे सारक्या फुडाऱ्याक आपल्या जाळांत ओडून इश्ट पक्षांची निरशेवणी ओडून घेतल्या. काँग्रेस पक्ष आनी ह्या पक्षाचे गोंयचे फुडारी अमीत पाटकार आनी युरी आलेमांव, पक्षांतल्यान फुटून भायर सरिल्ल्या फुडाऱ्यां विशीं कितले ठाम आसात हें सांगप कठीण आसलें तरी इजिदोर फर्नांडीस सारक्यांक विजय सरदेसाय हांणी आपल्या गळाक लायले उपरांत काँग्रेस आनी आरजीपी ह्या दोनूय पक्षां मदीं जी प्रतिक्रया उमठली ती पळयत जाल्यार ‘मिनी’ गठबंधनाची कल्पना साकार जातलीच असें सांगपाचें धाडस कोणूय करीत अशें दिसून येना. फुटिरांक बराबर घेवन युती जावंकच शकची ना अशें विरोधी पक्ष फुडारी युरी आलेमांव म्हणटात. जाल्यार आरजीपीचे मनोज परब आदींनीय ताका आक्षेप घेतला. हे फाटभुंयेर मिनी गठबंधन पुर्णत्वाक येतलें आनी सत्ताधारी भाजपाक जिल्हो पंचायत वेंचणुकेंत शह दिवंक शकतलें अशें कोणाकूय दिसत जाल्यार तो भ्रमूच थारतलो. गोवा फॉरवर्डाचे विजय सरदेसाय हांकां गोंयांत भाजपा आड विरोधक एकठांय आयिल्ले जाय, हे विशीं दुबाव ना. पूण तांची प्रत्यक्ष कृती मात युती खातीर अनुकूल आसा अशें मानूंक येवचें ना.
युती खातीर एके वटेन वाटाघाटी चालू आसतना विजय सरदेसाय हे मात बचावाचेर भर दिनासतना फॉरवर्डाक वचून खेळूंक लागिल्ल्यान युतीची समिकरणां इबाडत चल्ल्यात. खोर्ली, पैंगीण आनी मांद्रें मतदारसंघांत उमेदवार निश्चीत करपाच्या गोवा फॉरवर्डाचे भुमिकेचेर काँग्रेसीन खर प्रतिक्रिया उक्तावप सभाविकूच आसा. प्रत्यक्ष वेंचणुकेक आतां कांय दीस उरिल्ल्यान आपल्याक फॉरवर्डाकूच खेळचें पडटलें अशें विजय सरदेसाय सांगत आसले तरी आपलो बचाव करपाचोच तातूंतल्यान तांचो यत्न दिसता. गोंयच्या गांवगिऱ्या वाठारांतल्या राजकी नाडीचो ठोको मेजपी हे वेंचणुके कडेन सगल्यांचेंच लक्ष लागलां. घटमूट संघटनशक्त, संसाधनांची भरपूर पुरवण आनी सेगीत सत्तेचो आत्मविस्वास अशा तिट्टी बळार भाजपा परतून एकदां जैत मेळोवपाचे तयारेंत आसा. पूण आतां खरी उत्सुकताय आसा ती विरोधकांच्या हालचाली विशीं. एकठांय येवपाची चर्चा नेटान चलत आसली तरी ती प्रत्यक्षांत हाडटना विरोधकांचे यत्न मात सेगीत गळटात. गोंयांतूय विरोधकांचो एकवट ‘शब्दां पुरती’ उरिल्ल्याचें स्पश्ट दिसून येता. कांय काळा पयलीं भाजपा वटेन झुकिल्ल्याचो आरोप, खूबशा पांवड्या वेले मतभेद आनी एकामेकां वेल्या अविस्वासाक लागून काँग्रेस – गोवा फॉरवर्ड समिकरणांत सेगीत पोकळसाण उरल्या. जिल्हो पंचायत वेंचणुकेच्या तोंडार फुटिरांक परतून पक्षांत घेतिल्ल्यान ही पोकळसाण आनीक रुंद जावची न्हय अशें खूबशा जाणांक दिसता.
जिल्हो पंचायत वेंचणुकेंत विरोधकांचे ‘मिनी’ गठबंधन सामक्या निमाण्या खिणाक आकाराक आयलें जाल्यार तातूंतल्यान तांचो फायदोच जातलो अशें म्हणूंक येवचें ना. सत्ते खातीर मतभेदांक तात्पुरती सवलत दिल्ल्याचो अर्थ तातूंतल्यान काडूंक येतलो. आतां मेरेन एकवटान लोकां सामकार गेल्ले जाल्यार खूबसो व्हडलो फरक घडये पडपाचो. आतां सगल्यांत वेगळी आनी ठाम भुमिका आम आदमी पार्टीची.
प्रदेशाध्यक्ष अमीत पालेकार हांणी स्पश्टपणान सांगलां की जिल्हो पंचायत वेंचणूक आमी स्वबळार लडयतले. आम आदमी पार्टीक गोंयांत आपली स्वताची अशी व्होट बँक तयार करपाची आसा आनी काँग्रेसी कडली नाळ जाल्यार दिल्लीतल्या वेंचणूक निकाला पसून तुटल्या. आम आदमीचें स्पश्ट मत अशें की दोनूय परंपरीक पक्षांचेर लोकांचो आतां विस्वास उरिल्लोच ना. पर्याय जाय आसत जाल्यार तो पर्याय स्वतंत्र आसचो. पूण वास्तव हें की गांवगिऱ्या वाठारांतली संघटण, थळाव्या पांवड्या वेले फुडारी निर्माण करप आनी मतदारसंघांत सक्रीय नॅटवर्क तयार करप हे विशीं ‘आप’ अजून सुरवातेच्या टप्प्यांत आसा. विरोधकांच्या युतीच्यो खऱ्यो आडमेळीं ह्यो तंत्रीक नासून ‘मानवी’ आसात. उमेदवारांचेर एकमत नासप, क्षेत्रीय फुडारपणाचें वर्चस्व, पयलींच्या मतभेदांचें वजें आनी कांय कडेन वैयक्तीक सर्ती ह्यो सगल्यो गजाली मार्गांत अाडखळ थारत आसात. काँग्रेसीक थळाव्या पांवड्यार स्वताचे चेरे मुखार हाडपाचे आसात. गोवा फॉरवर्डाकूय स्वताची पकड सिद्ध करपाची आसा. जेन्ना विरोधक खूबशा भुमिकांनी आडकल्ले आसतात, तेन्ना सत्ताधारी पक्ष आनीक घटमूट दिसूंक लागता. जिल्हो पंचायत वेंचणूक ही थळाव्या प्रस्नांची आसली तरी तिच्या निकालांतल्यान गोंयच्या राजकी प्रवाहाची दिशा निश्चीत जाता. विरोधकांनी एकामेकां वेलो अविस्वास कुशीक दवरून एकठांय येवपाचो निर्णय घेतलो ना, जाल्यार ही वेंचणूक भाजपा खातीर सोंपी आनी विरोधकां खातीर आनीक एक संद व्हगडावपी थारुये.
वामन प्रभू
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
