भांगरभूंय | प्रतिनिधी
पणजीः गोंय वैजकी महाविद्यालय आनी गोंय दांत महाविद्यालयांत रोस्टर आधारीत १०० टक्के आरक्षण दिवपाचें आस्वासन विधानसभेंत दिवन लेगीत मुख्यमंत्री डॉ़. प्रमोद सावंत हे मागास समुदायाक न्याय दिवपाक अपेसी थारल्यात. सरकारान एका सप्तका भितर हे आरक्षण जाहीर करचे ना जाल्यार मुख्यमंत्रीच्या घरा भायर आमकां आंदोलन करपा शिवाय दुसरो पर्याय आसचो ना, अशीं शिटकावणी गोंय कॉंग्रेशीचे प्रदेशाध्यक्ष अमित पाटकार हांणी दिली.
ओबीसी, एससी, एसटी आनी इड्ब्ल्युएस खातीर गोंय वैजकी महाविद्यालय तशेंच दांत विद्यालयांतल्या क्लिनिकल सिटात रोस्टर आधारीत १०० टक्के आरक्षण दिवपाची मागणी करीत गोंय कॉंग्रेस ओबीसी मोर्चान आझाद मैदानाचेर धरणें आंदोलन केलें. ह्या वेळार कॉंग्रेसीचे प्रदेशाध्यक्ष अमित पाटकार उलयताले. ह्या वेळार दक्षिण गोंयचे खासदार कॅ. विरीयातो फर्नांडीस आनी हेर कॉंग्रेस फुडारी हजर आसले.
फाटले खेपे गोंय वैजकी महाविद्यालय आनी दांत महाविद्यालय हातूंत क्लिनिकल सिटां जाहीर जाल्लीं. मात तातूंतलीं १३ सिटां- ९ ओबीसी आनी ४ एसटीक आरक्षित जावपाक जाय आसलीं. पुण गोंयच्या मागास समुदायाक ह्या सिटांक अर्ज करपाक संद मेळूंक ना, असो आरोप पाटकार हांणी केलो.
आज हें प्रमोद सावंताचे सरकार सांगता की आमचेकडेन ३३ आमदार आसात. मात हे भाजपाचे ३३ आमदार मदी ओबीसी, एससी, एसटीचे प्रतिनिधित्व करपी आमदार मोनी बाबा जावान आपलीं तोंडां धांपून आसात. ४ ओगस्टल २०२५त एका सप्तका भितर आरक्षणाची अधिसुचोवणी काडपाचे आश्वासन
मुख्यमंत्र्यान विधानसभेच्या पटलार दिल्लें. पुण आयज साडे तीन म्हयने जाले प्रमोद सावंताचे भाजप सरकार आयजय गोंयचे एससी, ओबीसी, एसटी वर्गाक चेंपपाचो यत्न करता हें उक्ताडार आयलां, असोय आरोप पाटकार हांणी केलो.
साडे तीन म्हयेन्या पयलीं गोंय राज्याचे मुख्यमंत्र्यान अधिसुचोवणी काडून १०० टक्के रोस्टर आधारीत आरक्षण करता म्हण सांगिल्लें. मागास समुदायाक अर्ज करपा पासत वंचित दवरपा खातीर हे विशींची कार्यावही जायना. मुख्यमंत्र्यान तीन दिसां भितर बेगोबेग कॅबिनेट घेवन आनी साडे तीन म्हयने पयलीं दिल्लें आश्वासन सप्तका भितर अधिसुचोवणी उजवाडाक हाडून काडपाक जाय. आरक्षण १०० टक्के रोस्टर आधारीत संविधानांत हक्क दिल्लो आसा ताची अंमलबजावणी करची, ना जाल्यार मुख्यमंत्र्याच्या घराकडे आमी आंदोलन करपाची शिटकावणी पाटकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
