भांगरभूंय | प्रतिनिधी
पणजी : महाराष्ट्र तशेंच कर्नाटकांत पावस झडिल्ल्यान थंयच्या भाजयो येवपाचें प्रमाण सध्या देंवला. हाका लागून पणजी बाजारांत भाजयांचें दर वाडतूच आसा. सोमारा बाजारांत तमाटांचें दर वाडून ८० रुपया किलो जालें. जाल्यार हंगामाचीं तोरांय बाजारांत आयल्यांत. थळावीं तोरां १०० रुपयांक ४ जाल्यार तोतापुरी तोरां १२० रुपया किलो अशे विकतले. फुडले कांय दीस भाजयांचें सर चडिल्लेंच आसतलेञ अशी शक्यताय व्यापार्यांनी उक्तायली.
बाजारांत बटाट आनी कांद्यांचें दर १० रुपयांनी वाडून तें दरेकी ५० रुपया किलो जालां. वालपापडीचें दर वाडून १२० रुपया किलो जालें. ढब्बू मिरची २० रुपयांनी म्हारग जावन १२० रुपया किलो जाली. कोबी आनी फ्लॉवर दरेकी १० रुपयांनी वाडून दरेकी ५० आनी ६० रुपयांनी जालां. भेंडे, घोसाळीं, गाजर, गवार दरेकी ८० रुपया आशिल्लें. ल्हान वायंगीं ६० रुपया जाल्यार व्हड वायंगीं ८० रुपया किलो आशिल्लीं. मिरसांग दर्जा प्रमाण ८० ते १०० रुपया किलो आशिल्लीं.
सोमारा पणजी बाजारांत आलें २० रुपयांनी वाडून १६० रुपया किलो जालें. जाल्यार लसूण दर्जा प्रमाण ३०० ते ३५० रुपया किलो आशिल्लें. दुदी ५० रुपये नग अशे विकताले जाल्यार शेवगो २० रुपयांनी वाडून १६० रुपया किलो जाल्यो. बाजारांत कांय वेपार्यां कडेन मटार उपलब्ध जाल्यात. हाची किंमत २०० रुपया किलो आसा.
बाजारांत मेथी तशेंच शेपू २५ रुपया जुडी आशिल्ली. पालक १५ रु., जाल्यार कोथंबीर २० रू. चुडी आशिल्ली. लिंबू ५० रुपयांक १५ नग दरान विकताले. सोमारा फलोत्पादन मंडळाच्या गाड्यांचेर भेंडे ६१ रु., कोबी ३६ रु. ,फ्लॉवर ४५ रु. एक नग, गाजर ६६ रु.,वालपापडी ६० रु. , मिरची ५५, कांदो २८, बटाट ३१ रु. जाल्यार टमाट ५३ रुपया किलो आशिल्लें.
ल्हान नाल्ल ३० रुपयांनी नग
फाटले कांय दीस बाजारांत ल्हान नाल्ल्याची किंमत ४० रुपया आशिल्ली. सोमारा हें दर उणें जावन ३० रुपया जालें. जाल्यार मध्यम आनी व्हड आकाराचे नाल्ल ४० ते ५० रुपयां मेरेन उपलब्ध आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
