भांगरभूंय | प्रतिनिधी
राज्य वेंचणूक आयोगाकडल्यान आरक्षणांत दुरूस्ती
पणजी : जिल्लो पंचायत वेंचणुकेच्या आरक्षणांत बारीक बदल करतना राज्य वेंचणूक आयोगान दक्षिणेचो राय मतदारसंघ आतां बायलां अनुसूचीत जमाती खातीर (एसटी) राखीव केला. पयलींच्या आरक्षणांत हो मतदारसंघ फकत अनुसूचीत जमाती खातीर राखीव आशिल्लो. आरक्षणाक उच्च न्यायालयांत आव्हान दिवपाचे फाटभूंयेर राज्य वेंचणूक आयोगान हो बदल केला.
जिल्लो पंचायत वेंचणूक पयलीं १३ डिसेंबराक जावपाची आशिल्ली. ती सप्तकभरान फुडें वचून आतां ती २० डिसेंबराक जातली. हे विशींचो आदेश पंचायत सचिवांनी जारी केला. वेंचणूक कार्यावळ आनी आचारसंहितेची अधीसुचोवणी मात जारी जावंक ना. मॅनुएल बोर्जीस, गजानन तिळवे आनी मोरीना रिबेलो हांणी आरक्षणाक उच्च न्यायालयांत आव्हान दिलां. हे आव्हान याचिकेचेर फाल्यां मंगळारा उच्च न्यायालयांत सुनावणी जातली. सुनावणी जाय मेरेन आचारसंहिता तशेंच तारखेविशींची अधीसूचोवणी जारी जावची ना. ही सुनावणी जावचे पयलीं राज्य वेंचणूक आयोगान आरक्षणांत बारीक दुरूस्ती केल्या. पयलीं दक्षीण गोंयांत रिवण हो एकूच मतदारसंघ बायलां एसटी खातीर राखीव आशिल्लो. आतां राय हो बायलां एसटी खातीर राखीव दवरिल्ल्यान दक्षीण गोंयांत बायलां एसटी खातीर दोन मतदारसंघ आरक्षीत जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
