भांगरभूंय | प्रतिनिधी
मडगाव: मडगांव रेल्वे स्टेशनावेल्यान सुटिल्ली कोकणकन्या एक्स्प्रेस गाडयेंतल्यान देंवपाचो यत्न करतना प्लॅटफॉर्माचेर पडिल्ल्यान एका प्रवाशाक रेल्वे सुरक्षा दळाच्या दोन दक्ष कर्मचार्यांनी वाटोवन जिवनदान दिलें. ही घडणून आयतारा सांजेवेळार सुमार सात वरांचेर मडगांव रेल्वेस्टेशनाच्या प्लॅटफॉर्म नंबर एकाचेर घडली.
मडगांवच्यान मुंबय वचपी रेल्वे नंबर २०१९२ (कोकणकन्या एक्स्प्रेस) गाडी प्लॅटफॉर्मावेल्यान वतना, गणेश लिंबराज श्रीदत्त (६६, उस्मानाबाद, महाराष्ट्र) नांवाचो एक प्रवासी चलपी रेल्वेंतल्या सकयल देंवतना प्लॅटफॉर्म आनी रेल्वे मदीं पडलो. हांगाच तैनात आशिल्ल्या रेल्वे सुरक्षा दळाचे कॉन्स्टेबल कपिल सैनी आनी रबारी सैंदा भाई (आर. एस. भाई) हे रोखडेच मुखार धांवून आयले. तांणी प्रवाशाक ओडून प्लॅटफॉर्माचेर घेतलो आनी रेल्वे पोंदाक वचपा पसून वाटयलो.
श्रीदत्त हो मुळचो उस्मानाबादचो. तो मडगांवच्यान थिवी वचपा खातीर गाडयेंत चडिल्लो. कांय कारणांक लागून परत सकयल देंवपाचो यत्न करतना तो पडलो. रेल्वे सुरक्षा दळाच्या ह्या दोनूय कर्मचार्यांनी प्रवाशाक देंवतना पळोवन प्रसंग वळखून निर्णय घेतिल्ल्यान तांचो जीव वाटवलो. कर्मचार्यांच्या ह्या कामा खातीर प्रवाशान ताचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
