दिवचलचो आयज नवो सोमार

भांगरभूंय | प्रतिनिधी

नामनेच्या गायकांच्यो रंगतल्यो मैफली

भांगरभूंय । प्रतिनिधी

दिवचल : दिवचलचो नामनेचो नवो सोमार उत्सव सोमारा 24 नोव्हेंबराक मनयतले. ते निमतान विवीध धर्मीक, सांस्कृतीक, स्पर्धात्मक कार्यावळी तशेंच नामनेच्या गायकांच्यो संगीत मैफलींचें आयोजन केलां.

दिलचलच्या गांवकारवाड्या वयल्या थळाव्या गांवकार मंडळा वतीन श्री शांतागिर्गा देवळांत हे निमतान सकाळ सावन धर्मीक विधी, म्हाअभिशेक, लघुरुद्र, आरती, तीर्थप्रसाद जातलो. ते उपरांत भाविकांक देवीची भक्ती रुपान सेवा करपाची संद राती उसरां मेरेन मेळटली.

राती वेळार श्री शांतादुर्गा देवीक सांगणे करून पालखी मिरवणूक काडटले. विठ्ठल रखुमाई वारकरी मंडळ तेरसे बाबर्डे हांची दिंडी तशेंच हनुमान बॅण्ड पंगड बाणस्तारी हांच्या सांगातान रातच्या 9 वरांचेर देवळांतल्यान पालखी काडटले.

रातच्या 10 वरांचेर श्री शांतादुर्गा देवीच्या प्राकारांत ‘ह्रदयाच्या तालावर’ ही अभंग, भक्तीगीत, नाट्यगीत, भावगीत, मराठी चित्रपट गितांची कार्यावळ जातली. ही कार्यावळ नामनेचे गायक राजयोग धुरी आनी शमिका भिडे (मुंबय) हे कलाकार सादर करतले. डॉ. गोविंद भगत निवेदन करतले.

दुसरी बैठक मध्यानरातीर 1.30 वरांचेर श्री रवळनाथ देवळाच्या प्राकारांत जातली. ‘इंद्रायणी काठी’ ही भक्तीगितांची कार्यावळ नामनेचे गायक ओम बोंगाणे (सारेगम फेम आनी उस्सताद रशीद खान हांचे शिश्य) सादर करतले. अक्षय सातार्डेकार हे निवेदन करतले.

देवळांत पालखी आयले उपरांत फांतोडेर आरती, तीर्थप्रसाद आनी सांगणे करून उत्सवाची सांगता जातली.

हे निमतान कोमुनिदाद सभामंडपांत राज्यपांवड्यार आनी दिवचल पालिका मर्यादीत रांगोळी सर्तीचें आयोजन केलां.

श्रीदेवी शांतादुर्गा देवस्थान बाजारकार धा जाण आनी नवो सोमार उत्सव समिती वतीन नव्या सोमारा निमतान भितरली पेठ श्री शांतादुर्गा मठांत सकाळीं 9.30 वरांचेर धर्मीक विधी, लघुरुद्र, दनपारां आरती आनी म्हाप्रसाद जातलो. सांजेच्या 7 वरांचेर देवीची पालखी बॅण्ड पंगडा सयत मठांतल्यान भायर सरून भाविकां खातीर भितरली पेठ लक्ष्मी नारायण देवळा कडेन खाशेल्या उबारिल्ल्या माटवांत देवी रावतली. हे मजगतीं थळाव्या कलाकारांची भजनाची कार्यावळ जातली. रातच्या 10 वरांचेर पालखी मिरवणुकेक सुरवात जावन पालखी भितरली पेठ, सोमार पेठ, भायली पेठ, बोड्डें वडेश्वरा कडेन वचून परत सुंदरपेठ आनी भितरली पेठ मार्गान मठांत येतली. उपरांत गाराणें जाले उपरांत उत्सवाची सांगता जातली.

उत्लवा निमतान गायनाच्यो मैफली जातल्यो. पयली बैठक भितरली पेठ मठांत रातच्या 10 वरांचेर जातली. तातूंत पं. जितेंद्र अभिषेकी हांचे नातू अभेद्य अभिषेकी, गायिका आनी संगितकार केतकी चैतन्य हांची गायनाची कार्यावळ जातली. तांकां ऑर्गनाचेर राया कोरगांवकार, हार्मोनियमाचेर प्रसाद गांवस, तबल्याचेर हनुमंत बिटये आनी पवन वळवयकार संगीतसाथ करतले. सोमारा दुसरी बैठक गुरू फंड ट्रस्ट भायली पेठेंत रातच्या 11 वरांचेर जातली. तातूंत गोंयचे गायक ओंकार च्यारी तशेंच दिप्ती गांवस हांचें गायन जातलें. तांकां तबल्याचेर रोहीत परब, हार्मोनियमाचेर आकाश जल्मी, पखवाजाचेर स्वरुपानंद गांवस, गोविंद गावठणकार हे संगीतसाथ करतले. संजय सालेलकार निवेदन करतले.