भांगरभूंय | प्रतिनिधी
सोशल मिडिया ह्या काळांत फोनूच लोकांचो सांगाती जाला. एकदां खंयचोय सोशल मिडिया अॅप उक्ते केलो जाल्यार वराचीं वरां ताका स्क्रॉल करीत रावतात आनी तांकां वेळा काळाचें कसलेंच भान उरना. इंस्टाग्रामाचेर रील पळोवपाचें व्यसन लेगीत अशेंय आसा. भारतांत साबार तरेच्या कंटेंटाचे क्रिएटर्स आसा, जे सद्दां वेगवेगळ्या गजालींचेर रील करतात. हातूंत कांय रील अशे आसतात, तातूंत एकादो दोतोरा भशेन वेगवेगळ्या दुयेंसांचेर उपचार सांगपाक लागता, जाल्यार कोण कायद्या विशीं सल्ले दितात. तातूंतली खूबशी म्हायती चुकीची आनी घुस्पागोंदळांत घालपी आसता. पूण कोटींनी लोकां मेरेन तें रील पावता. हें पळोवन चीनान आतां एक नेम तयार करपाचो थारायला. तातूंत रील करचे खातीर डिग्रीची गरज आसा.
खरें म्हणल्यार चीन सरकारा वतीन चुकीची म्हायती आडावपा खातीर आनी लोकांक ताचे पसून वाटावचे खातीर एक खास नेम लागू करपाचे आसा, तातूंत खंयच्याय विशयाचें ज्ञान दिवप वा ताचेर उलोवपा खातीर त्या विशयांतली पुराय म्हायती आनी डिग्री आसप गरजेचें आसा. म्हणल्यार जर एकादो भलायकी वा वैजकी मळा संबंदांत रील तयार करता जाल्यार ताचे कडेन मान्यताय प्राप्त डिग्री वा योग्यता आसप गरजेचें आसा. हाका लागून शिक्षण, कायदो आनी अर्थीक ह्या सारकिल्ल्या गंभीर विशयाचेर उठसूट कोणूच व्हिडियो पोस्ट करपाक शकचो ना.
चीनांत चलपी साबार सोशल मिडिया प्लेटफॉर्मांक हाची जापसालदारकी दिल्या. ते पयली खरेपण तपासतले. जर कायद्या विशींचो सल्लो वा उपचारा विशीं सल्लो दितात जाल्यार तांचे कडेन त्या विशयाची डिग्री वा अभ्यास आसा काय ना तें पळयतले. अशें ना जाल्यार तांचो व्हिडियो अरलोड जावचो ना.
चीन सरकारा वतीन चुकीची बातमी आनी चुकीची म्हायती आडावपा खातीर हो निर्णय गेतला. अधिकाऱ्यांच्या म्हणण्या प्रमाण, अशे रील वा व्हिडियो करपी लोकांची दिशाभूल करतात. हे खातीर ताचेर आळाबंद हाडप गरजेचें आसा. अशें आसलें तरीय चीनांत लोक ह्या निर्णयाचो विरोध करता आनी ताका सामान्य लोकांचेर सेंसरशीपी भशेन पळयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
