भांगरभूंय | प्रतिनिधी
पणजी: गोंय सरकारान शुक्रारा, २२ नोव्हेंबराक एक महत्त्वाचो आनी इतिहासीक निर्णय जाहीर केला. ह्या निर्णया प्रमाण, आतां बारीक सारीक गुन्यांवांत दोशी सांपडिल्ल्या पयलेच फावट गुन्यांव करप्यांक बंदखणी जाग्यार कम्युनिटी सर्वीस करपाची शिक्षा दितले.
भारतीय न्याय संहिता (इछड) २०२३ तल्या संबंदीत कलमां प्रमाण आनी मुंबय उच्च न्यायालया कडेन चर्चा करून हो निर्णय घेतलो. ही कम्युनिटी सर्वीस १ ते ३१ दिसांच्या काळा खातीर आसतले आनी हातूंत चार वरां ते २४० वरां मेरेन काम करचें पडटलें.
शिक्षा म्हणून ही सेवा सरकारी हॉस्पिटलां, कार्यालयां, उद्यानां, दर्यादेगो आनी शिषणीक संस्थां सयत विवीध सरकारी आस्थापनांनी दिवपाचे निर्देश जारी करतले. ह्या कामांत नितळसाण, सांबाळ-दुरुस्ती, तशेंच हॉस्पिटलांत वॉर्डची नितळसाण, ट्रॉली साहाय्यता, अपघात वेवस्थापन आनी झाडां रोवपाचो अश्या विवीध कामांचो आसपाव आसतलो. न्यायालयाच्या निर्देशा प्रमाण सरकारी अधिकारी हे कार्यावळीचें निरीक्षण करतले.
ह्या उपक्रमा फाटल्यान शिक्षणा जाग्यार गुन्यांवगारांक सुधारणेचेर लक्ष केंद्रीत करपाचो उद्देश आसा. गैर-हिंसक आनी पयलेच फावट गुन्यांव करप्यांक समाजांत परत स्थान मेळोवन दिवपाक मजत जातली. कायदेतज्ज्ञांच्या मतान, पोरणे शिक्षा पद्धतीक लोगून पयलेच फावट गुन्यांव करप्यांक समाजांत हीन नदरेन पळयतात जाका लागून तांकां सामान्य जिणेंत परतुवप कठीण जाता. अशे तरेच्या रचनात्मक बदलांक लागून फकत गुन्यांवकारी प्रवृत्तीच्या मूळ कारणांचेर लक्ष दितले. तशेंच तांणी समाजांत पुरत आसपाव घेवपाक मजत जातली, अशें कायदे तज्ज्ञांनी मत उक्तायलें.
बारीक गुन्यांवकारी प्रवृत्ती नियंत्रीत करपा खातीर आनी गुन्यांवकारांचें पुनर्वसन करपा खातीर हे उपाय म्हत्वाचे थारतले.
चोरयेचे गुन्यांव: ५,००० रुपयां परस उण्या किमतीचे चोरयेंत दोशी सांपडिल्ल्या गुन्यांवकारांनी चोरी केल्ली मालमत्ता परत केल्यार तांकां सामुदायीक सेवे खातीर पात्र थारावपाक शकता.
हे गुन्यांव सोर्याचे नशेंत भौशीक सुवातेर बोवाळ घालप आनी बदनामी अश्या प्रकरणांतूय बंदखणी जाग्यार सामुदायीक सेवेची शिक्षा जावपाक शकता.
बंदखणींत बारीक गुन्यांवकारांक गंभीर गुन्यांवकारांच्या संपर्कांत येवचें पडटा, जाका लागून तांच्या शरिरीक आनी मानसीक भलायकेचेर नकारात्मक परिणाम जाता. ह्या रचनात्मक बदलाक लागून फुडाराक गुन्यांवकारी प्रवृत्ती आडावपाक मजत जातली, अशी अपेक्षा आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
