भांगरभूंय | प्रतिनिधी
पणजी : गोंयांत 31 मार्च 2024 च्या निमाणे मेरेन सरकारी कर्मचाऱ्यां मदले 50.01 टक्के कर्मचारी पयली ते बारावी पास आशिल्ले. जाल्यार 6.55 टक्के जाणांनी पदविका, 26.28 टक्के कर्मचाऱ्यांनी पदवी आनी 11.96 टक्के कर्मचाऱ्यांनी पदव्युत्तर पदवी घेतिल्ली. सांख्यिकी खात्याच्या अहवालांतल्यान ही म्हायती मेळ्ळ्या. तातूंत सरकारी खातीं, स्वायत्त संस्था, अनुदानीक संस्था आनी भौशीक उपक्रमांत काम करपी कर्मचाऱ्यांचो आस्पाव केल्लो.
अहवाला प्रमाण गोंयांत 31 मार्च 2024 च्या निमाणे मेरेन वट्ट 63 हजार 970 सरकारी कर्मचारी आशिल्ले. तातूंतले 2,072 (3.23 टक्के) चवथी, 8,638 (13.50 टक्के) णववी, 11 हजार 295 (17.65 टक्के) धावी जाल्यार 10 हजार 1 (15.63 टक्के) कर्मचारी बारावी पास आशिल्ले. 16 हजार 813 कर्मचाऱ्यांनी पदवी आनी 7,655 जाणांनी पदव्युत्तर पदवीचें शिक्षण पुराय केल्लें. ताचे भायर 4191 जाणांनी पदविका जाल्यार 2023 जाणांनी (3.16 टक्के) आयटीआय केल्ली. तेचवरी 1,282 (2 टक्के) कर्मचाऱ्यांनी पदव्युत्तर पदवीचे फुडलें शिक्षण घेतिल्लें.
गोंयांत 2019 चे तुळेंत 2024 त उच्चशिक्षीत सरकारी कर्मचाऱ्यांची संख्या 1.10 टक्क्यांनी वाडल्या. 31 मार्च 2019 चे निमाणे मेरेन गोंयांत वट्ट 63 हजार 162 सरकारी कर्मचारी आशिल्ले. तातूंतल्या 6,862 जाणांनी (10.86 टक्के) पदव्युत्तर पदवीचें शिक्षण घेतिल्लें. जाल्यार 2,129 (3.37 टक्के) चवथी, 9,637 (15.25 टक्के) णववी, 11 हजार 803 (18.68 टक्के) धावी जाल्यार 9,158 (14.49 टक्के) कर्मचारी बारावी पास आशिल्ले. 16 हजार 813 कर्मचाऱ्यांनी (26.61 टक्के) पदवी पास केल्ली.
सरकारी नोकरेंतल्या बायलांची टक्केवारी वाडली
अहवाला प्रमाण 2019 चे तुळेंत 2024 त सरकारी नोकरेंतल्या बायलां कर्मचाऱ्यांची संख्या 1.77 टक्क्यांनी वाडल्या. 31 मार्च 2019 च्या निमाणे मेरेन गोंयांत वट्ट सरकारी कर्मचाऱ्यां मदीं 35.74 टक्के बायलां आशिल्ल्यो. 31 मार्च 2024 च्या निमाणे मेरेन ही टक्केवारी वाडून 36.61 टक्के जाली.
‘ड’ गटांतल्या कर्मचाऱ्यांची संख्या देंवली
गोंयांत 2029 त वट्ट कर्मचाऱ्यां मदले 3,605 (5.70 टक्के) हे ‘ड’ गटांतले आशिल्ले. 2024 त ही संख्या उणी जावन 1,588 (2.48 टक्के) जाली. 2019 त 46 हजार 127 कर्मचारी (73.02 टक्के) हे ‘क’ गटांतले आशिल्ले. 2024 त ही संख्या वाडून 48 हजार 792 (76.27 टक्के) जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
