भांगरभूंय | प्रतिनिधी
भांगरभूंय । प्रतिनिधी
पणजीः गोंय रानां उदरगत म्हामंडळ जानेवारी म्हयन्यांत रानां विवीधताय महोत्सव आयोजीत करपाचो आसा. हो तीन दिसांचो महोत्सव आयोजीत करपा खातीर सुमार देड कोटी इतलो खर्च येतलो. ह्या महोत्सवाचे आयोजन आनी नियोजना खातीर म्हामंडळान निविदा जारी केल्या.
आर्ट पार्क कापांल-पणजे हांगासर 9 ते 11 जानेवारी 2026 मजगतीं रानां विविधताय महोत्सवाचें पुराय आयोजन तशेंच हेर सुविधा उबारून कार्यावळींचें नियोजन करपा खातीर निविदा जारी केल्या.
पश्चिम घांटातली रानां विविधतायेक फावो ती प्रसिध्दी आनी प्रोत्साहन दिवपाचो ह्या महोत्सवाचो हेत आसा. पर्यटन भागधारक तशेंच पर्यटकां मदीं रानां विविधतायेची जागृताय करप, गांवगिऱ्या वाठारांत इको ट्युरीजमाक प्रोत्साहन दिवप आनी ग्रामीण अर्थवेवस्था सुदारप, गांवातल्या तरणाट्यांची ताक विकसीत करप, गोंयचे गांवगिरे वाठार आनी रानां वाठारांक प्रोत्साहन दिवन, गोंयची गिरेस्त ग्रामीण दायज उजवाडांक हाडप आनी ह्यां क्षेत्रात वावुरपी भागधारकांक वाव दिवप हो ह्या महोत्सवाचो हेत आसा.
ते भायर ह्या महोत्सवांत विविध एजन्सी आनी भागधारकांक आपले विचार आनी आपली दृष्टी मांडपा खातीर माची मेळटली तातूंत ग्रामीण अर्थवेवस्था, बायलां सशक्तीकरण, आप मजत गट, गोंय पर्यटन, हॉटेल, कॅफे आनी रेस्टोरंट संघटना, टूर आनी ट्रेव्हल एजन्सी, होम स्टे, शिक्षण संस्था, येरादारी वेवसायीक, पारंपारीक वैज आनी रानांत रावपी लोकांक हाचो लाव मेळटलो.
ह्या महोत्सवांत 3*3 मीटरांची 40 स्टॉला, 100 निमंत्रण पत्रिका, मुखेल माची, मनरिजवण कार्यावळी, लायटी आनी सावंड सुविधा, जायरात आनी हेर गजाली धरून ह्या महोत्सवाक सुमार 1.50 कोटी खर्च येवपाचो आसा. निविदा वेळार चडांत चड बोली लागून हाचो खर्च वाडपाचो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
