भांगरभूंय | प्रतिनिधी
21 व्या शेंकड्यांतल्या कोंकणी साहित्याचे नवे प्रवाह आनी प्रयोग परिसंवाद उमेदीन
भांगरभूंय । विशाल खांडेपारकार
एरणाकुळम, कवी के अनंत भट माची : केरळांत २६ वें अखिल भारतीय कोंकणी साहित्य संमेलनाचें दिवली पेटोवन उक्तावण जालें. ह्या वेळार मुखेल सोयरो म्हूण सरस्वती सन्मान जोडपी साहित्यकार प्रभा वर्मा, मानाचो सोयरो राजभाशा उपसंचालक अनिल सावंत , अध्यक्ष माधव बोरकार, परिशदेचे कार्याध्यक्ष चेतन आचार्य, सचीव स्नेहा सबनीस, संमेलनाचे स्वागताध्यक्ष सदानंद भट, संमेलन कार्याध्यक्ष आनंद कामत आनी हेर हाजीर आशिल्लें.
मुखेल परिसंवादांत डॉ. भूषण भावे उलयताले. विशय 21 व्या शेंकड्यांतल्या कोंकणी साहित्याचे नवे प्रवाह आनी प्रयोग प्रो. भूषण भावे (गोंय) हांचे अध्यक्षे खाला उमेदीन जालो.
कोंकणींत चड आनी चड प्रादेशीक साहित्य निर्माण जावपाची गरज आसा. गोंयच्यान गोंया भायर गेल्ल्या गोंयकारांचीं जीण, हावेस, उत्फर्के आनी प्रस्न हांचेर बरोवपाची गरज आसा. पर्यावरणाची जाण, समज आशिल्लें आनी ताचे विशीं हुस्को आशिल्लें साहित्य येवंक जाय. वंचीत समाज, बायलां, आदिवासी आनी खासा करुन लोकवेद हांचेर चड साहित्य लेखन करचें, जातूंत डॉक्युमेंटेशन, डिजिटलायजेशन आनी तांचेर विश्लेषण जावंक जाय. कोंकणी साहित्यांत हें प्रवाह मेळपाची गरज आसा अशें भावे हांणी सांगलें. Flash Literature, micro poetry अशें तरेचे ई लिटरेचर लेगीत निर्माण जावप गरजेचें अशेंय तांणी सांगलें.
ह्या वेळार वांटेकारः डॉ. वामन नायक (महाराष्ट्र) हांणी गोंयच्या साहित्याची सद्याची गोंयची स्थिती, डॉ. हरीन्द्र शर्मा (केरळ) हांणी केरळी मोडींतलें कोंकणी साहित्यांतले प्रवाह, डॉ. जॉकिम पिंटो(कर्नाटक) हांणी मंगळुरी बोलींतलें कोंकणी भाशा साहित्य अशा विशयांचेर आपलीं मतां मांडलीं.
केरळांत 26वें अखिल भारतीय कोंकणी साहित्य संमेलनांत कवी के अनंत भट माचयेर साहित्य सादरीकरण आयोजीत केलें. सुरवेक संयोजक आकाश गांवकार हांणी मानेस्तांक येवकार दिवन कार्यावळीचें सुत्रसंचालन केलें. लेखक चंद्रबाबू शेट्टी हांणी यादस्तीक दिवन साहित्यिकाचो भोवमान केलो. कमलाकर म्हाळशी, भिकू बोमी नायक, वामन टाकेकार, विवेक पिसुर्लेकार, किरण म्हांबरे, विठ्ठल आवंदीयेकार, उषा कामत, रत्नमाला दिवकार, विल्सन कटील, प्रशांती तळपणकार, विनायक गोवेकार, उदय गुडे, मिलींद भरणे, सरस्वती नायक, पंढरीनाथ सुरसुरे आदी गोंय, केरळा, मंगळूर, महाराष्ट्र साहित्यकारांनी साहित्य सादरीकरणांत वांटो घेतलो.
ह्या वेळार कोंकणी साहित्य संमेलनांत वेगवेगळ्या पुस्तकांचें लोकार्पण जालें. पुस्तकां सकयल दिल्ले प्रमाण-
१. मनोगत कविता- अंजली किणी, २. लोकवेद : रंग आनी रूप (लोकवेद निबंद), लेखक- डॉ. जयंती नायक, 3. ओमकार पुष्प तिसरें लेखक पुष्पा नायक (कविता), 4. एक पान हळदुळी, लेखक वैष्णवी प्रितेश रायकार (लोकवेद). 5. विचित्र विचार, (कविता संग्रह), लेखक विजयकुमार एन. पै, 6. पिकी- पिकी काजुले, ( काणुल्यो) वर्धा सिनाय खांडेपारकार, प्रकाशक- कवी खगेन्द्र हेगडे देसाय, 7. कोंकणी कविता- फुलोर, लेखक आर रामानंद प्रभू (कोरम्बो), 8 अवसू गोया मौसी मलाबार, लेखक : आर सदानंदन मास्टर (नाटक), 9. चौगुल्यो, लेखक – के. एन. आर. भट (नवलिका), 10. शांतामानस्मृती, पी जी कामत, संकलन पय्युमूर रमेश पै, 11. कोंकणी भाशा परिचय, सत्येंद्र शैणय, 12. कासावतनी, (कथा) माया अनिल खरंगटे, 13.वोवळां पोड, (निबंद) पद्मनाभ नायक, 14 कलावती, कृष्णा वाडियार (कांदबरी) 15. हैरिडिटी, ग्लैनीश मार्टीस, 16 वित्तीय साक्षरताय लेखक डाॅ. वामन रा. नायक. 17. साद पडसाद , लेखक प्रो. भूषण भावे, प्रकाशक- अल्फा अक्षर (लीलेश कुडाळकार), १८. समजणेचें माध्यम, अणकार – प्रो. भूषण भावे, प्रकाशक – एन.सी.ई.आर.टी. दिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
