बदलपी राजकारणांत जिल्हो वेंचणूक

भांगरभूंय | प्रतिनिधी

जिल्हो पावंड्यावेल्यान शिकिल्ली अस्तुरी विधानसभेर व्हडा प्रमाणात पावतली अशी आस्त सरकार दाखोवंक लागलां.

जिल्हो पंचायत वेंचणूक आठ दिसांनी फुडें धुकल्ल्या. खासा मतदार वळेरी फेररचणूक चल्ल्या ते खातीर वेंचणुकेचे तारखेंत बदल करुंक ना. तारीख बदलची पडली ती कोर्टांत आरक्षणाक आव्हान दिल्ल्यान. वाडपी लोकसंख्या, नवे आरक्षण वळेरेचो विचार करुन वाॅर्डांची फेररचणूक जाल्या आसूंये. लोकसभा वेंचणुकेचे उपरांत जावपी गोंयांतली ही वेंचणूक. जिल्हो वेंचणुकेंत मतदान करतना मतदार राजकारणात मुखेल करुन सरकारांत जाल्ले बदल, उदरगतीचेर चिंत्तले. गोंयांत साक्षरताय वाडल्या, उंचेलें शिक्षण घेवपी वाडत वतात, मतदार चिंत्ता, मतदाराक सोंपेपणी कोण बोल्सांत घालूंक शकना हें वेंचणुकेंतल्यान दिसतलें.
खिणांत विरोधांतले सगले राजकी पक्ष एकठांय येतात अशें आयकूंक येता आसतना आम आदमी पार्टी आपल्या बळग्याचेर जिल्हो वेंचणुकेंत देंवता. ‘आपा’ न हालीं जाल्ल्या कांय मुखेल राज्यांच्या विधानसभा वेंचणुकांतल्यान पावल फाटीं घेतलां. ताचो लाव कोणाक जाता तें मतदारांक कळ्ळां. सगल्यांत पयलीं आमी जिल्हो वेंचणुकेच्या प्रचाराक लागल्यात, अशें सगलेच राजकी पक्ष सांगतले. मतदारां कडेन विंगड विंगड कार्यावळींतल्यान वचपी खंयचो राजकी पक्ष कोण ताची जाणवीकाय मतदारांक आसा. मतदारांक थिरायेचें म्हत्व कळ्ळां. गोंयचेंच न्हय, केंद्र सरकारय आतां थिराय दिता. गुन्यांव राज्यांत, देसांतय वाडटात, तितलोच येवजणींचो लाव मतदारांक मेळटा हें सत. जिल्हो वेंचणुकेचे उपरांत 2027 सुरवेक वा 2026 अखेरेक जावपी गोंय विधानसभा वेंचणुकेंत फाटल्या चार वर्सांनी, 2012 सावन गोंयांत जाल्ली उदरगत नदरेआड करुंक येवचीना. ते उदरगतीचो अभ्यास करुन, देसांतलेंच न्हय बदलपी तापमान बदल समजून घेत नवो अजेंडा गोंयां खातीर जावपाची गरज आसा. देसांतल्या हेर राज्यांनी तापमान बदलांतल्यान लुकसाण चड जालां, गोंयांक लुकसाणाचो धपको बसला. एके वटेन शेतकाम करपी वाडल्यात दुसरे वटेन पडंग शेतां, भूंय विकपीय वाडटात. आसात त्या शेतांचे मॅपिंग करप, भूंय सांबाळप सरकार, समेस्तांचीय लागणूक. भूंय विकपाचीं प्रकरणां फाटल्या चाळीस वर्सांनी जाल्यांत, हालीं तीं नदरेक आयल्यांत, कारवाय जाता, हाचे फुडें खर कारवाये पासत कायदे करपाक जाय.
शेंकड्यांनी पुलीस आपल्या बदलेचे सुवातेर वचूंक ना हें दुसरें फावट उक्तें जालें. ताका गृहमंत्र्यां परस गृह सचीव, तंत्रज्ञानात शिरकल्ले पुलीस अधिकारी, थळावी लागणूक आशिल्ल्या गोंयच्या पुलीस अधिकाऱ्यांची रिटायरमेंट जापसालदार आसात. सरकारांत हालीं जाल्ल्या बदलांतल्यान, भौशीक बांदकाम खात्याचें वजें उणें जाल्ल्यान मुख्यमंत्र्यांक गृहखात्याक वेळ दिवंक मेळटा. पुलीस प्रशासनय जाग्यार घालपाच्या वावराक सुरवात जाल्या. सरकारा आड उलोवपी आमदार गोविंद गावडे आयज जिल्हो पंचायत वेंचणुकेंत तेंको दिवन उमेदवारांक वेंचून हाडटले. श्री. गावडे हांच्या नेतृत्वाची, तांच्या कलेच्या गुणांची जाणवीकाय आदले मुख्यमंत्री मनोहर पर्रीकार हांकां जाल्ली. तांकां आदले शेतकाममंत्री रवी नायक हांचे सुवातेर 19 डिसेंबरा पयलीं हाडल्यार 2027 त भाजपा सरकार सत्तेर येवपाक बळगें मेळटलें. एक गजाल खरी मंत्रीपदा वयल्यान विसव मेळिल्ल्यान कलेक, मतदारसंघाक ते वेळ दिवंक शकल्यात. आपल्या समाजांतल्या तरणाट्यांक ते राजकारणांत येवपाक मार्गदर्शन करतले. तांचो आवाज, तांचे दोळे ही व्हड देण. समाजाक एकठांय हाडपाची कला तांच्या आंगांत आसा. भाजपा प्रदेसाध्यक्ष दामोदर नाईक हे आमदार म्हणून जे पद्धतीन वावुल्ले ते दीस आयज नात. वेळार शिस्तीची याद करुन दिवपाक आयजय ते फाटीं रावना. इफ्फीच्या उक्तावणाक भाजपाचे खासदार, केंद्रीय मंत्री श्रीपाद नाईक, प्रदेशाध्यक्षांनी येवप, कार्यकर्त्यांक जागोवप गरजेचें आशिल्लें. मुख्यमंत्र्यांक नवें कितें तरी करपाक तांची उर्बा फुडारांत उपेगी. कोयर वेवस्थापनमंत्री आमदार बाबुश मोन्सेरात उक्तावणाक दिसलेना पूण तांचे कार्यकर्ते थेटरा मेरेन पावल्यात, आप वावुरप्या मदीं तांचोय आसपाव दिसलो. जिल्हो पंचायती तिसवाडींत जिखपाक भाजपाचे आदले, आतांचे आमदार भोव उपेगाचे.
गोवा फाॅरवर्ड पक्षाची बांदावळ करपाक उणो पडला, सरकाराच्या मजतीन पक्षान कांय मतदारसंघांनी उदरगतींत वांटो उखलला. विरोधी पक्ष मुखेली युरी आलेमांव आपल्या भावा, भयणींक राजकारणांत हाडपाचें चिंत्तले. बापाय परस ते चड शिकल्यात, शिक्षण तांचे खातीर राजकारणात उपेगाचें. घरा बसून पणजेतलीं चित्ररथ मिरवणूक पळोवंक मेळटा तें तांकां कळ्ळां. मिरवणुकीतलें संगीत, नाचाची कला मन भुलोवणी, ती कला, कलाकार जिल्हो पंचायत राजकारणांतल्यान फुडें येवची. इफ्फींतले चित्ररथ मिरवणुकींत फाटल्यांतल्यान राजकी विशय मांडिल्ले दिग्दर्शक, निर्मात्यांक होल्मल्यात. ती खोस उक्तावणाचो सिनेमा पळयतना कलाकारांच्या तोंडार दिसताली. उणेपण आसूनय काळखांत उजवाड दाखोवपी पणजेंतलो इफ्फी सृजनशिलतेक एकठांय हाडपी. ज्ञानपीठकार दामोदर – भाई मावजो हांचें पिकाॅक नेमाळ्यांत बरयल्लें संपादकीय जिल्हो वेंचणुकेंत गांवागांवांनी पावोवचें. पिकाॅक आयज मोबायलार मेळटा, ग्रीन काॅरीडाॅरा कडेन वचपाक इफ्फीच्या मुखेल जाळवणदारांक आदार. ज्ञानपीठकारांक, गिन्यान्यांक मनरिजवण सोसायटीचेर हाडपाची गरज आसा.
एका तेंपार मनरिजवण सांबाळपी राजेंद्र तालक, भोवभाशिक कलाकार प्रिन्स जेकब, पयलींचे सभापती तोमाझिन कार्दोज, भाजपाचे कार्यकर्ते शर्मद रायतुरकार, अभिनेत्रा वर्षा उसगांवकार, दिग्दर्शक राजेश पेडणेकार, लक्ष्मीकांत शेटगांवकार हांकां मनरिजवण सोसायटीर खासा वांगडी म्हणून घेवचे. गोंय सिनेनिर्मणेचें केंद्र कशें जावचें ती दिका दाखोवपाची तांक तांचे लागीं आसा. कला अकादमीत गोंय फिल्म सोसायटी जावची हें लेखक, दिग्दर्शक अडुर गोपालकृष्ण हांचें सपन. तांचीं सपनां फिल्मांतल्यान जिल्हो पावंड्यावेल्यान, शेतांतल्यान न्हंयें मेरेन वचपी. जिल्हो पंचायतीचे उपरांत येवपी विधानसभा वेंचणूक, पणजी म्हापालिका वेंचणूक सरकाराच्या दोळ्यां मुखार आसा. इफ्फींतल्या मिरवणुकीतलें वाजप, मुख्यमंत्र्यांचें भाशण जिल्हो पावंड्यार खीणा भितर पावलां ल्हारा ल्हारांतल्यान. न्हय फकत टीव्हीवेल्यान गाडी चलयतना मोबायलांतल्यान.
इफ्फींत युवाशक्त येता केरळ ते राजस्थान मेरेनची, काश्मीर आनी गोंयची, ओरिसा, महाराष्ट्रांतली. जिल्हो पावंड्यां वयली वेवसायिक पद्धतीन मुखार सरील्ली. गोंयच्या दोनूय जिल्हो पावंड्यार ल्हानशा सभाघरांतल्या जिल्हो भवनांतल्यान फुडारांत विधानसभेर आमदार येवचे. जिल्हो पावंड्यावेल्यान शिकिल्ली अस्तुरी विधानसभेर व्हडा प्रमाणात पावतली अशी आस्त सरकार दाखोवंक लागलां. नसाय दादल्यांक जातलीच, पूण अस्तुरेक नवी वाट दाखयल्यार ती भायर सरता, घरांत बसून रावना हें बिहारांतले वेंचणुकेन दाखोवन दिलां. बिहारांत सोऱ्याचेर बंदी हाडून राश्ट्रपिता महात्मा गांधीजी हांच्या विचारांतलें राज्य घडोवपाचो व्हड वावर देसांत जाता. गोंयांत ती देख जिल्हो ते विधानसभा वेंचणुकेंतल्या राजकारणांत दिवची, दिसची.

सुहासिनी प्रभुगांवकार
9881099260