भांगरभूंय | प्रतिनिधी
बाबू कवळेंकार : गोंयांत नाट्यलेखक नाशिल्ल्याची खंत
भांगरभूंय । प्रतिनिधी
पणजी : कला अकादमीचे नाटक सर्तीच्या नेमा प्रमाण तशेंच सर्तीच्या परिक्षकांच्या गुणांनी बसनाशिल्ल्यान अंदूंचे कोंकणी नाटक सर्तींत लेखनाचें पयलें इनाम दिनासतना रावपाची ही पयलीच घडणूक न्हय. फाटली कितलीशींच वर्सां कला अकादमी वतीन घेतात ते मराठी आनी कोंकणी नाटक सर्तीच्या नेमां प्रमाण खूब खेपे इनामां दिवंक नात. युगांक नाटक हांणी केल्ल्या आरोपांचेर कला अकादमीचे अध्यक्ष बाबू कवळेंकार हांणी आपली भुमिका मांडली. तशेंच कोंकणी नाटक सर्तींत लेखनाचें पयलें इनाम दिवंक ना, ताचे फाटल्यान कसलोच राजकी हेतू ना, अशें तांणी सांगलें.
2007-08 त मराठी नाटक सर्तीच्या ब गटांत, 2009-10 त कोंकणी नाटक सर्तींत, 2014-15 आनी 2015-16 त मराठी नाटक सर्त ब गटांत नाट्य लेखनाचें पयलें इनाम दिवंक नाशिल्लें. तेचवरी 2021-22 त कोंकणी नाटक सर्तींत लेखनाचें पयलें आनी दुसरें इनाम दिनासतना लेखकांक प्रशस्तीपत्रां दिल्लीं, अशें कवळेंकार हांणी सांगलें. कला अकादमीचे नाटक सर्तीची नेमावळ नव्यान करपाचो विचार करतले. तशेंच गोंयांत आदले वरी नाट्यलेखक ना. नाट्यलेखक उणें जायत आशिल्ल्यान कला अकादमी नाट्यलेखकां खातीर 60 दिसांचें शिबीर घेतले. हे विशींची पुराय म्हायती कांय दिसांनी दितले, अशें कवळेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
