भांगरभूंय | प्रतिनिधी
पणजी : गोंयांत फाटल्या कांय दिसांनी पडिल्ले दरोडे, वाडपी गुन्यांवकार हे फाटभूंयेर विरोधकां कडल्यान सरकाराक लक्ष करतात. आयपीएस अधिकार्यांची नियुक्ती जावनूय गुन्यांव उणे जावंक ना. वयल्यान ते दिसान दीस वाडतूच आसात. हेच फाटभूंयेर हरिश्चंद्र मडकयकार हांची नियुक्ती उत्तर गोंय अधीक्षक पदार केल्या. हाका लागून पुलीस खात्यांतूय सकारात्मक चर्चा सुरू आसा. आतां वाडपी गुन्यांव आडावपाचें आव्हान गोंयचे उत्तर जिल्लो पुलीस अधीक्षक हरिश्चंद्र मडकयकार हांचे मुखार आसा.
गोंयांत ह्यान पयलीं मूळ गोंयकार आशिल्ले खुबशे बरे पुलीस अधिकारी जावन गेले. संघर्ष करीत मुखार आयिल्ल्या ह्या अधिकार्यांनी गुन्यांव नियंत्रणांत हाडून गोंयचो कायदो आनी सुवेवस्था सांबाळपा खातीर म्हत्वाची भुमिका केल्या.
ह्या पुलीस अधिकार्यांचो एक वेगळो धाक आनी युनिफॉर्म आशिल्लो. कायदो आनी सुवेवस्था सांबाळपा खातीर तांकां सुट आशिल्ली. हातूंत नांवां घेवपाची जाल्यार प्रभाकर सिनारी, महेश गांवकार, उमेश गांवकार, ऍलन डिसा, बोसुएट सिल्वा, सेमी तावारीस हे निवृत्त पुलीस अधीक्षक हांचे सयत आतांचे पुलीस अधीक्षक संतोष देसाय अश्या खुबश्या अधिकार्यांचीं नांवां घेव येतात.
डीआयजी म्हणून निवृत्त जाल्ले अरविंद गांवस (आयपीएस), बॉस्को जॉर्ज (आयपीएस) हांचोय ह्या अधिकार्यां मदीं आसपाव आशिल्लो.
गोंय आतां पुरायेन बदल्लां. तेन्ना गोंयांत पर्यटन वेवसाय इतलो वाडूंक नाशिल्लो. तशेंच गोञयच्या भायल्यान नोकरी, वेवसाय आनी हेर कामां खातीर येवप्यांचोय आंकडो उणो आशिल्लो. आतां पर्यटन वेवसायूय नेटान वाडटा. तातुंतल्यानूच कांय घुवळे वखदां आनी तेच फाटभूंयेर हेर नकारात्मक गजालीय गोंयांत पातळपाक लागल्यात. कॅसिनो गोंयांत वाडत आसा. हेच फाटभूंयेर गोंयांत गुन्यांव वाडपाक लायल्यात. दरोडो, घरां फोडप आनी तत्सम गुन्यांवांत गुंथिल्ले आतां आधुनीक तंत्रज्ञानाचो वापर करपाक लागल्यात. हाका लागून गुन्यांव जावप वाडलां.
गोञयांत फाटल्या कांय म्हयन्यांनी खुबश्यो गुन्यांवकारी घडणुको घडल्यात. गणेशपुरी, म्हापश्यां डॉक्टरांच्या बंगल्यार पडिल्ल्या सशस्त्र दरोड्या उपरांत बायणा, वास्को चार दिसां फाटीं नायक कुटुंबियांच्या फ्लॅटाचेरूय सशस्त्र दरोडो खालून ३५ लाख रुपयांचें सामान चोरलें.
गणेशपुरी, म्हापश्यां दोतोराच्या बंगल्यार दरोडा घातिल्ले गोंयां सयत हेर राज्यांतल्या पुलिसांक कॅटां करून बांगलादेशांत पाविल्ल्याचें तपासांत मुखार आयलां.
वाडपी गुन्यांवकारी नियंत्रणांत हाडपा वांगडाच फाटल्या कांय दिसांनी घडिल्ले गुन्यांव, दरोडे हांचो तपास करून आरोपींक धरपाचें आव्हान उत्तर जिल्ह्याचे पुलीस अधीक्षक हरिश्चंद्र मडकयकार हांचे मुखार आसा. पुलीस अधीक्षक मडकयकार हांची प्रतिमा बरी आशिल्ल्यान एक कर्तव्यदक्ष अधिकार्याक न्याय मेळिल्ल्याची भावना सध्या उक्तायल्या.
मडकयकार अणभवी पुलीस अधिकारी
मुखेल म्हणल्यार मडकयकार पुलीस सेवेंत गुञथिल्ले अधिकारी. पुली उपनिरीक्षक, निरीक्षक, उपअधीक्षक ते पुलीस अधीक्षका मेरेन पाविल्ले अधिकारी. हाका लागून तांचे कडेन पुलीस सेवेंतलो बरोच व्हड अणभव आसा. ताच्या ह्या अणभवाचो फायदो गुन्यांवकारी नियंत्रणांत हाडपांत जातलो अशें मानतात. हाका लागूनच उत्तर जिल्लो पुलीस अधीक्षकांची जापसालदारकी तांचे कडेन दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
