भांगरभूंय | प्रतिनिधी
म्हजें मत
काँग्रेसीचेर टिका करीत- करीत 2014 त नरेंद्र मोदी हांणी भारतीयांक ‘अच्छे दिनां’चो उलो घालो. ते वेंचणुकेंत अभुतपूर्व अशें सत्तांतर जालें. प्रधानमंत्री मोदी हांणी भाजपाक नवो चेरो दिलो. मोदी नांवाच्या जादवान भाजपाक सेगीत तीन फावटी सत्ता मेळोवन दिली. मोदी सरकार सत्तेर येतकच आतां अच्छे दिन येतलेच हाची 100 टक्के मतदारांक खात्री जाल्ली. मात फाटलीं 10 वर्सां म्हारगाय वाडत आशिल्ल्यान लोक त्रासल्यात.
म्हारगायेचे अर्थवेवस्थेचेर कितें परिणाम जातात, हें पळयतकच दिसलें की म्हारगाय बाजारांत चड पयसो आशिल्ल्यान वाडटा आनी पयसो उणो आसल्यारुय वाडटा. बाजारांत पयसो चड जालो काय लोक मेळत त्या मोलाक वस्तू विकत घेतात. ताका लागून म्हारयाग वाडटा. तातूंत केंद्र सरकाराच्या फाटल्या 10 वर्सांच्या चुकीच्या धोरणांक लागून म्हारगायेंत सातत्यान भर पडल्या. मात ताचे आड एकल्यार भारतीयान अजून आवाज काडूंक ना. घडये ताका धाडस जायना आसतलें.
दुसरे वटेन जीएसटी, नोटा बंदी, विवीध करांक, धोरणांक लागून लोकांचे तिजोरेंत भर पडली तरी ताचें वजें म्हारगायेच्या रुपांत लोकांचेर पडपाक लागलां. जीएसटीच्या चार स्लॅबां मदल्यान 28 टक्क्यां मेरेन वाडिल्लें वजें आतां कमी जालें आसलें तरी ताचो थेट लाव लोकांक जाल्लो दिसना. भाजयो, फळां, तांतयांची दरवाड सामकी सोंसपाक जायना अशी जाल्या. गिरायक मोल निर्देशांकांत सतत घसरण जाले उपरांत ही वाड जाल्या. हाचो परिणाम म्हूण जात्रा, सणा- परबांक साबार वस्तुंचें विशेश करून खाणां, भेटवस्तूंचें मोल वाडपाक शकता. हाचेर सरकारन कितें तरी उपाय काडपाक जाय. हे म्हारगायेक लागून फुडल्या कांय म्हयन्यांनी जिणेंगरजेच्यो वस्तू वाडपाक शकतात. देखून सामान्य भौसाक थाकाय दिवपाचो विचार ह्या डबल इंजिन सरकारान करपाकूच जाय.
अन्नधान्य, भाजयांचे मोल वाड हुस्को करपा सारकें. लोकांच्या कल्याण खातीर सरकारांनी काम करपाक जाय. डबल इंजिन सरकार म्हारगाय उणी करपाक वावुरतले, अशी आशा करुया.
– गजानन बा. नायक भाटकार
आल्त पर्वरी (बार्देश)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
