भांगरभूंय | प्रतिनिधी
हांव रावणाक थांबयतां पडलो, आनी ताणेंच जानकीक व्हेल्या…. अशें सांगुन पक्षीराज जटायून देह दवरलो. ताच्या देहाचें दहन करून राम- लक्ष्मण फुडें सरले. वाटेर कबंध नांवाचो मोटो राक्षस वाट आडोवन उबो आसलो. तो फक्त घड आसलेलो आणि मस्तक नासलेलो वनुपुत्र आसलो. ह्या दोगांची वळख पटल्या उपरांत तो म्हणपाक लागलो, ‘श्रीरामा, इंद्रान म्हाका अशें सांगला, की लक्ष्मणा सयत राम जेन्ना वनांत येवन तुजें हात तोडटलो तेन्ना तुं सर्गांत वतलो. हे खातीर श्रीरामा म्हाका मार आणि लासून उडय.” श्रीरामान ताका सांगलें, तुं म्हाका म्हजे सीतेक रावणान व्हेल्या ताचे विशीं सगळी म्हायती सांग.”
‘तूं पयलो म्हजो देह दहन कर. मागीर तुका सगळें सांगतां.’ कबंधान म्हणलें. शेवटाक राम-लक्ष्मणान ताका एका व्हडल्या फोंडांत घालो आणि ताका अग्नी दिलो, तेन्ना एक ज्वाला भशेन तो भायर आयलो आनी ताणें म्हणलें, ‘तूं किष्कींधापती सुग्रीवा कडेन बरेपण कर तो तुका मदत करतलो आनी तुजा बायलो सोद लायतलो.’ अशें सांगून तांकां रस्तोय दाखयलो.
पंपा सरोवराच्या पश्चिमेक पावले उपरांत श्रीरामांक शबरीचो आश्रम मेळ्ळो. ती खूब आनंदान, उत्साहान फुडें आयली आणि म्हणपाक लागली…..
तुजे चरण आश्रमा…
धन्य हांव शबरी श्रीरामा, लागले तुजे चरण आश्रमा ।।धृ।।
चित्रकुटाक ह्या चरण लागले,
मुनी कितलेशे मुक्त जाले,
झाडा पोंदा तुं राव मात्सोसो, पिशेक कर तूं क्षमा ।।1।।
ह्या पावलांच्या पुजे खातीर आतां,
जान्हवी दोळ्यांन्सून ओत्ता,
हस्तपाद प्रक्षालन करा, विसरा प्रवासांतल्ल्या श्रमा ।।2।।
गुरुसेवेन हें जीवन ओंपलें चंदनाचें विलेपन केलें.
काश्टवत ह्या देहार फुल्लां सुख रोमरोमा ।।3।।
निज ज्ञानाचे दीप पेटयतां,
अर्चन आत्मनिवेदन करतां,
सांवळें सुंदर रूप घेवन, आयला देव म्हज्या आश्रमा ।।4।।
नैवेद्य म्हूण, देवाक कितें दिवं,
प्रसाद म्हूण परतें कितें घेंव.
आयज भिकाऱ्या घरा आयल्या, भुकेल्ली पौर्णिमा ।।5।।
देवा, घेवचीं कंदमुळां हीं
खायात, आवडीन गोड बोरां हीं,
ह्या परस वनवेलींनी दिवंचें कितें पूर्णकामा ।।6।।
बोरा चाबलीं ना रे पक्ष्यांनी,
हांवें चाखल्यांत तीं म्हज्या दातांनी,
गोड तितलीं फुडें दवरल्ल्यां न्ही पळोवन लालीमा ।।7।।
सौमित्र दुबावानसो पळयता दृष्टीं
ना अभिमंत्रीत ना तीं रे उष्टीं,
वेदांचे माधुर्य वोठांत आसता जाणून घे श्रीरामा ।।8।।
– उदयबुवा फडके (राष्ट्रीय कीर्तनकार)
97642 43377
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
