भांगरभूंय | प्रतिनिधी
एमपीएचे चेअरमन एन. विनोदकुमार हांची म्हायती
पणजीः मरिना प्रकल्पा खातीर मुरगांव बंदर प्राधिकरणान (एमपीए) आठ हजार चौखण मिटर उदकाचो वाठार दिला. निविदे वरवीं दिल्लो हो प्रकल्प एक कंपनी विकसीत करता. एमपीए हातूंत गुंतवणूक करची ना. फक्त भाडें घेतली, अशी म्हायती एमपीएचे चॅरमन डॉ. एन. विनोद कुमार हांणी दिल्या. नावशेचो मरिना प्रकल्प आतां मुरगांवां, ही बातमी सगल्यांत पयलीं भांगरभूंयन दिल्ली.
राज्यांत वादग्रस्त थारिल्लो मरिना प्रकल्पान आपलो मुक्काम नावशेवेल्यान आतां मुरगांव बंदरात घुंवडायला. फुडल्या वर्सा मेरेन मरीना प्रकल्प पुराय जातलो. ह्या प्रकल्पाची जेटी टर्मिनल तयार जावन काम निमण्या पांवड्यार आसा, अशी बातमी सगळ्यांत पयली भांगरभूंयन उजवाडाक हाडिल्ली.
हे बातमेक एमपीएचे चॅअरमन विनोद कुमार हांणी अधिकृत दुजोरो दिलो.
मरीना प्रकल्प विकसित करपा खातीर एमपीएन 8 हजार उदकाचो वाठार दिला. ही मरीना बांदपाच्या कामाची निविदा मरीनटॅक कंपनीक दिला. ही कंपनी मरीनात सगळी गुंतवणूक करून उफेवपी जेटी आनी हेर सुविधा उबारतली. एमपीए कसलीच गुंतवणूक करची ना ते फकत उदकाच्या वाठारा खातीर लीज शुल्क एकठांय करतले, अशें विनोदकुमार हांणी सांगलें.
मरीना ही बोटीं खातीर एक पार्किंग सुविधा आसतली. जर मरीना बांदतले आसत जाल्यार हेर संबंदीत सुविधा येवप गरजेच्यो. पूम ही मरिना देशी आनी अंतरराष्ट्रीय क्रुझ टर्मिनलाक तेकूंन आशिल्ल्या कारणान सगळ्यांक संबंदीत सुविधा येतल्यो आनी हे सेवेचो यॉट ऑपरेटर्सांक घेवपाक मेळटलो, अशी म्हायती विनोदकुमार हांणी दिली.
राज्यांत पर्यटनाक चालना दिवपा खातीर यॉट आनी हेर तरेच्यो पॉश बोटीं नांगरून दवरपा खातीर जेटी बांदपाचो हावेस एमपीएन उक्तायल्लो. एमपीएन प्रस्तावित आहोय मरीना हो प्रकल्प गोंय गुंतवणूक प्रोत्साहन मंडळा (आयपीबी) वरवी सुरवेंक तिसवाडीच्या नावशी गावांत प्रस्तावित केल्लो. पूम हो प्रकल्प थळाव्या नुस्तेकारांचे पोटार येतलो म्हूण थळाव्यांनी ह्या प्रकल्पांक नेटान विरोध केलो. ह्या विरोधाक लागून हो प्रकल्प आयपीबीन स्थगित दवरिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
