भांगरभूंय | प्रतिनिधी
पणजी : जोडीदार सरकारी काम करपीच जाय म्हणून थळ सोदप्यां खातीर ही बातमी. गोंयांत ६३,९७० सरकारी कर्मचार्यां मदल्या ५१,०५५ कर्मचार्यांनी आपूण लग्न जाल्ल्याची म्हायती अहवालाच्या सर्वे वेळार दिल्या, जाल्यार वट्ट १२,९०७ कर्मचारी आंकवार आसात.
८ कर्मचार्यांनी आपल्या लग्नाविशीं कांयच म्हायती दिवंक ना. सरकारी खात्यांत काम करपी ९,०२१ कर्मचारी लग्न जावंक नात तशेंच अनुदानीत संस्थां मदल्या २,९७७, जाल्यार महामंडळां सारकिल्ल्या संस्थांनी ६७२ कर्मचारी आंकवार आसात.
सरकारी नोकर भरतींत २०१९ ते २०२४ मेरेन कांय सकारात्मक बदल दिसल्यात. नव्या अहवाला प्रमाण ह्या पांच वर्सांनी सरकारी कर्मचार्यां मदीं एसटी, एससी आनी ओबीसी वर्गांतल्या ३,८१० कर्मचार्यांची वाड जाल्ल्याचें स्पश्ट आसा. २०१९च्या अहवालांत ह्या वर्गांतल्या सरकारी कर्मचार्यांचो आंकडो १६,७८१ इतलो आशिल्लो तो २०२४ च्या अहवालांत २०,५१९ इतलो जाला.
१ एप्रिल २०१९ ते ३१ मार्च २०२४ मेरेन निवृत्त जाल्ल्या कर्मचार्यांचो आंकडो उपलब्ध ना तरी हाचे मजगतीं फकत ८०८ कर्मचार्यांची भर पडल्या अशेंच म्हणचें पडटलें. मात, हे मजगतीं जाल्ल्या नोकर भरतींत आदिवासी, अनुसुचीत जाती आनी ओबीसीच्या वर्गांतल्या कर्मचार्यांच्या आंकड्यांत मात्शी वाड जाल्या. सरकारी कर्मचारी २०१९ त ६३,१६२ इतले आशिल्ले ते २०२४त ६३,९७० इतले जाले. हातूंत सरकारी खातीं, स्वायत्त संस्था, सरकारी अनुदानीत संस्था आनी महामंडळांतल्या कर्मचार्यांचो आसपाव आसा.
व्हड लोकसंख्येचे म्हाल आशिल्ले सासश्टी आनी बार्देशांतल्या सरकारी कर्मचार्यांचो आंकडो देवला. २०१९च्या अहवालांत सासश्टी म्हालांत ९,५७६ सरकारी कर्मचारी आशिल्ले ते २०२४ त ८,७०१ इतले जाल्यात, जाल्यार बार्देशांत ९,७३८ कर्मचारी आशिल्ले ते आतां ९,२५७ इतले आसात. सासश्टींत ८७५, जाल्यार बार्देसांत ४८१ सरकारी कर्मचारी फाटले तुळेंत देंवल्यात. ह्या आंकड्यांवेल्यान निवृत्त जावपी कर्मचार्यांचो आंकडो गोंयांत चड आसा हें अधोरेखीत जाता.
२०२२त जाल्ल्या विधानसभा वेंचणुके मजगतीं जाल्लो नोकर भरतीचो प्रभावूय ह्या अहवालांतल्यान दिसता. २०१९ ते २०२४ ह्या पांच वर्सांनी सत्तरी म्हालांतल्या सरकारी कर्मचार्यांचो आंकडो १ हजारान वाडला. २०१९ त तो आंकडो ४,४६६ आशिल्लो तो आतां ५,४४४ इतलो जाला. फोंडें महालांत फाटले फावटीं ८,४१३ सरकारी कर्मचारी आशिल्ले ते आतांच्या अहवालांत ८,७०४ इतले जाल्यात.
२०१९ च्या अहवालांत गोंयच्या सरकारी कर्मचार्यां मदीं एसटी नोकरदारांचो आंकडो ५,९८२ आशिल्लो तो आतां ७,४९० इतलो जाला. ओबीसींचो आंकडो ९,४७० आशिल्लो तो आतां ११,६७२ जाला, जाल्यार एससींचो आंकडो १,३२९ आशिल्लो तो आतां मात्सो वाडून १,४२९ जाला.
मजगतीं, गोंय सरकाराच्या वेगवेगळ्या ८९ सरकारी खात्यांनी सरकारी कर्मचार्यांचो आंकडो ४३,९२१ इतको आसा. तातूंत ३०,२२२ दादले जाल्यार १३,६९९ बायलांचो आसपाव आसा.
सरकारी अनुदानित संस्थांनी १५,८२९ कर्मचारी आसात. जातूंत ९,४०४ बायलो आसात आनी ६,४२५ दादले आसात. अनुदानीत संस्थांनी शाळांचो आंकडो व्हड आसा. शिक्षण संस्थानी ९,९४६ कर्मचारी आसात जातूंत सगल्यांत चड ७,०१९ बायलो आसात.
स्वायत्त संस्था जातूंत विद्यापीठ, मराठी अकादमी, कोंकणी अकादमी अशा १४ संस्थांचो आसपाव आसा थंय ८४८ कर्मचारी आसात. सगल्यांत चड ६४४ कर्मचारी गोंय विद्यापीठांत आसात.
महामंडळां आनी हेर मेळून २० संस्थांनी ३,३७२ कर्मचारी आसात. जातूंत २,८६८ दादले आनी ५०४ बायलो कर्मचारी आसात. अशे मेळून सरकारी सेवेंत ६३,९७० कर्मचारी आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
