भांगरभूंय | प्रतिनिधी
सांगेंच्या शेतकारांचो आरोप; शेताची वाट बंद केल्ल्याचो दावो
भांगरभूंय । प्रतिनिधी
सांगें: मंत्री सुभाष फळदेसाय दादागिरी करून सांग्यार आयआयटी हाडपाक सोदता. आतांच इतली दादागिरी जाल्यार फुडारांत कितें जातलें? पुलीस बंदोबस्त दवरून आमच्या शेतांत वचपाची वाट आडायतात. शेतकारांक सतावपाचो हो प्रकार चल्ला, असो आरोप किरागाळ उदक वांटप संस्थेचे अध्यक्ष कॉस्तावसियो मास्कारेन्हस हांणी केला.
सांग्यार शेतकारांनी आयआयटीक विरोध केल्ल्यान शेतकारांक सतावपाचें कारस्थान च ल्लां. आमच्या शेतांत आमकां वचपाक मेळना. सर्व्हेक्षणा वेळार कसलोच आवाज जावचो न्हय हे खातीर सुमार 300 पुलीस हाडिल्ले. पूण सांगें पुलीस निरिक्षकान गरजेभायर शेतकारांचेर जमनीचें सर्व्हेक्षण जावचे आदींच कागाळ दिल्ल्यान शेतकार चाळवल्यात.
ह्या विशयाचेर सांगें उपजिल्होधिकारी कार्यालयांत सुनावणी चालू आसा. पूण फुडली फुडली तारीख दिवन शेतकारांक सतावपाचो खेळ चल्ला. हो खेळ ताकतिकेन बंद केलो ना जाल्यार शेतकार न्यायालयांत वतले अशी शिटकावणी मास्कारेन्हस हांणी दिल्या. ह्या वेळार तांच्या वांगडा हेर शेतकार हाजीर आशिल्ले. किरागाळ उदक वांटप संस्थेंत 115 शेतकार आसात. दुसरे संस्थेंत 50 आनी तिसरे संस्थेंत 30 अशें वट्ट 205 शेतकार आसात. दोंगराचेर उदकाचे सात फांटे आसात. हो दोंगर आसा म्हूण आमी सुसेगाद आसात. हो दोंगर जर कांपलो जाल्यार बुडटी येतली. शेतकारांक त्रास करून, दोंगर कांपून आमकां आयआयटी नाका. मुख्यमंत्र्यान सांग्यार नगर मारची. आमदाराची दादागिरी बंद करची, अशी विनवणी शेतकार मिल्टन फर्नांडीस हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
