भांगरभूंय | प्रतिनिधी
पर्वरेच्या एलिवेटेड कॉरिडॉराच्या कामाचक फटको
पणजी: येरादारी वळोवपा खातीर सरकारी मंजुरी मेळपाक जावपी कळावाचो व्हड फटको आतां राष्ट्रीय महामार्ग-६६ वेल्या स पदरी आनी ५.१५ किलोमीटर लांबायेच्या पर्वरेच्या एलिवेटेड कॉरिडॉराच्या कामाचेर बसला. म्हत्वाच्या येरादारी वोल्तांक सरकारान मंजुरी दिवंक नाशिल्ल्यान, प्रकल्पाचे उदरगतींतली ही सगल्यांत व्हड आडखळ थारता अशी कबुली बांदकाम विभागाच्या अधिकार्यांनी दिली.
प्रकल्पा कडेन संबंदीत वरिश्ठ पीडब्ल्यूडी अधिकार्यांनी दिल्ले म्हायती प्रमाण, सुपरस्ट्रक्चर सुरक्षितपणान उबारपाक गरजेची आशिल्ली येरादारी वळोवप लागू करपाक खात्याक येस येवंक ना. कामाचे सुवातेर नेमान येरादारी सुरू आशिल्ल्यान, बांधकाम करप्यांक सुरक्षितताय आनी कार्य समन्वय अश्या दोनूय सुवातांचेर गंभीर आडखळींक तोंड दिवचें पडटा.
प्रकल्पाचें सुमार ५५ टक्के काम पुराय जालां तरी, सध्या कामाची गती मात्शी उणी जाल्या. पयलीं प्रकल्पाची सुदारीत निमाणी मुजत ऑक्टोबर २०२६ आशिल्ली, मात सध्याचे गतीन ही मजित डिसेंबर २०२६ वा २०२७ च्या सुरवाते मेरेन मुखार धुकलपाक शकता. आमी येरादारी पुलीस आनी उपविभागीय दंडाधिकारी हांचे कडेन चर्चा करतात, जाका लागून हाचेर कितेंय उपाय काडपाक मेळटले, अशेंय तांणी सांगलें.
कंत्राटदार कंपनीच्या अधिकार्यांनीय हीच चिंता उक्तायली. येरादारी वळोवपाची परवानगी नाशिल्ल्यान निर्धारित ऑपरेशन्स करप शक्य जायना, हाचो परिणाम कामाची गती सुमार ५० टक्के उणी जाल्या. यंत्रां आनी मनीस तशेच पडून आसात. ही आडखळ कायम उरल्यार प्रकल्प २०२७ मेरेन लांबायेर पडपाची शक्यताय तांणी उक्तायली.
विशेश म्हणल्यार, पर्यटन मंत्री रोहन खंवटे हांणी हालींच हो प्रकल्प ऑगस्ट २०२६ मेरेन पुराय जातलो, असो दावो केल्लो. खंवटे हांणी रस्ते बंद करिनासतना येरादारी आनी सुरक्षिततायेचे समस्येचेर बेगोबेग उपाय सोदपाक सेगीत पळोवणी आनी बसका घेतल्यो. पणजी आनी म्हापशें मजगतीं येरादारी कोंडी उणी करपा खातीर हो कॉरिडॉर एक म्हत्वाचो प्रकल्प आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
