इफ्फी : तरणाट्यांक संद

भांगरभूंय | प्रतिनिधी

गोंयकारांचे आवडीचो एक म्हत्वाचो उत्सव आशिल्लो इफ्फी हो आंतरराष्ट्रीय चित्रपट महोत्सव बिरेस्तार 20 नोव्हेंबराच्यान सुरू जाता. हो फक्त सिनेमांचो महोत्सव न्हय, त्यो फक्त पड्ड्या वयल्यो कथा न्हय, तर नवे विचार, कल्पनाशक्त आनी युवा पिळगेक प्रेरणा दिवपी उत्सव. तो आयच्या तरणाट्यांक जागतीक पांवड्या वयले सिनेमा दाखयता आनी तरेकवार संस्कृतायांचो नवो दृश्टीकोन दिता. तातूंत कलात्मक आनी तंत्रज्ञान एकठांय जावन नवे विचार निर्माण जातात. इफ्फी सपनांक जाग हाडटा, तीं प्रत्यक्ष जिवितांत हाडटा. हांगा फक्त सिनेमा पळोवप जायना तर नव्या विचारांचें, संस्कृतायांचें दिवप  घेवप जाता. नवे विचार समजून घेवपाक बळगें दिता. 

जांकां सिनेमाची आवड आसा, तो शिकपाक जाय, सिनेमा मळाच्या विवीध विभागांत काम करपाक जाय, तांणी हे संवसारीक मळा वयले सिनेमा पळोवपाक जाय. वास्तव आनी कल्पनाशक्तीचो आत्मविस्वास ताका लागून वाडटा. अभिनय सुदारता. अभिनेय, लेखन, दिग्दर्शन, फोटोग्राफी, नेपथ्य ह्या मळाचेर करियर घडोवंक सोदतात तांणी ह्या इफ्फी महोत्सवांतले सिनेमा पळोवकं जाय. थंयच्यो चर्चा आयकूंक जाय. ते स्वता कलाकार जावं शकतात, कलेच्या मळाचेर वावुरपाचो आत्मविस्वास, इत्साशक्त निर्माण जाता. नांव आनी पयसो जोडपाचीय प्रेरणा मेळटा. इफ्फींत वांटेकार जावप ही आमच्या तरणाटे पिळगे खातीर भांगराळी संद. गोंयान हो महोत्सव फाटलीं कितलींशीच वर्सां जावप म्हणल्यार दुदांत साकर. 

ह्या महोत्सवाचे फायदे खूब आसात. तरेकवार विशयांचे सिनेमा पळोवंक मेळटात. समाजीक, संस्कृतीक आनी मानवी मुल्यांची वळख जाता. चित्रपट निर्मणी, अभिनय, पटकथा, लेखन, छायाचित्रण अशा साबार विभागांची आवड निर्माण जाता. असल्या उपक्रमांनी सहभागी जावप बरें. कारण ते फक्त मनोरंजन करीनात जाल्यार मनशाचो सर्वांगी विकास  जावपाक मजत करतात. 

इफ्फी संवसारा कडेन पळोवपाची नवी प्रेरणा दिता. दरेका सिनेमाची कथा वेगळी आसता. संघर्श, सपनां, आशा, निरशेवणी, सुख- दुख्ख आशिल्लीं पात्रां, भुमिका करपी कलाकार खरेंच तोखणाय करी सारके. तरणाट्यांनी इफ्फींत वांटेकार जावंक जाय. कारण कार्यशाळांनी मेळपी अणभव. कलाकारां वांगडा थेट संवाद, आत्मविस्वास, प्रेरणा, कुशळटाय विकासा खातीर उपेगी पडटा. व्यक्तीमत्व उदरगती खातीर तरणाट्यांनी ह्या महोत्सवांनी वांटेकार जाल्यार बरें. 

– सिद्धी तिळवे