भांगरभूंय | प्रतिनिधी
पणजी : गोमंतक बालशिक्षण परिशदेच्या ‘बालक’ सप्तकाचो समारोप आयज 20 नोव्हेंबराक आंतरराष्ट्रीय बालदिसा फोंड्यां जातलो. सेवानिवृत्त प्राचार्य आनी समाज कार्यकर्ती प्रा. सुमन सानंत हांचे हाजिरेंत ही कार्यावळ सांजेच्या 4 वरांचेर सुरू जातली.
परिशदेन राष्ट्रीय बालदीस (14 नोव्हेंबर) ते आंतरराष्ट्रीय बालदीस (20 नोव्हेंबर) हें बालविकास सप्तक गोंयभरांत विवीध संस्थांच्या पालवान आयोजीत केल्लें. तातूंत बालदीस (श्रीस्थळ- काणकोण), बाल- स्वातंत्र्य दीस (केरी- सत्तरी), युनेस्को स्थापना दीस (खडपाबांद- फोंडें), समग्र शिक्षण दीस (आकें- मडगांव), सैमीक उपचार दीस (गांवठण- पिळये, धारबांदोडें), राष्ट्रीय एकता दीस (कासारपाल दिवचल) हांच्यो कार्यावळी वट्ट स म्हालांनी जाल्यो. तातूंत व्याख्यानां, पुस्तक प्रकाशन, परिसंवाद, बडबडगीत सत्र, शिक्षक संवाद, पालक प्रबोधन, चित्रांगद अशे विवीध उपक्रम हातांत घेतिल्ले.
कमलाकर म्हाळशी, झिलू गांवकार, पद्मनाभ प्रभुदेसाय, उल्हासचंद्र गायतोंडे, कमलाकर देसाय, प्रकाश गांवकार, सुनिता देसाय हांणी संयोजक म्हूण काम केलें, जाल्यार प्रकल्प समन्वयक शुभदा मराठे आशिल्ली.
समारोप सुवाळ्यांत मुळाव्या शिक्षणा वयलीं कात्रण संकलन प्रदर्शन आनी परिक्षण जातलें. सप्तकाचो नियाळ ह्या वेळार सादर करतले. प्रा. सामंत हांचें आंतरराष्ट्रीय बालदिसा निमतान मुख्य भाशण जाले उपरांत सप्तकाची सांगता जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
