भांगरभूंय | प्रतिनिधी
पणजी : गोंयांत तरणाट्यां मदीं काळजाच्या आताकाचें आनी स्ट्रोकाचें प्रमाण वाडटा, अशी म्हायती एका डेटांतल्यान मुखार आयल्या. वाडपी काळजाचे आताक, स्ट्रोक आडावपा खातीर प्रतिबंधात्मक उपाय म्हणून डॉक्टर नेमान रक्तदाब आनी कोलेस्टेरॉलाची तपासणी करपाक लायता. ४० वर्सां पिराये सकयल्या तरणाट्यां मदीं काळजाच्या आताकाचें, स्ट्रोकाचें प्रमाण वाडलां.
वैजकी तज्ञ जिणेशैली, उच्च ताण, सिगरेट ओडप, सोरो पियेवप चुकीच्या आहाराची संवय हें सगलें हे परिस्थितीक कारण थारिल्ल्याचें सांगतात.
जीएमसींत २ वर्सांनी २९०४ प्रकरणां नोंद
गोंय वैजकी महाविद्यालय हॉस्पिटलांतल्या एका वरीश्ठ दोतोरान सांगलें, फाटल्या दोन वर्सांनी काळजाच्या दुयेंसाचीं दोन हजार, ९०४ प्रकरणां नोंद केल्यांत. काळजा संबंदी दुयेंसाक लागून सदांच चार दुयेतींक दाखल करतात.
२०२३चे तुळेंत २०२४ वर्सा १४.३ टक्क्यांनी वाड
गोंयच्या भलायकी सेवा संचालनालयाच्या नोंदी प्रमाण २०२३चे तुळेंत २०२४ वर्सा काळजाच्या दुयेंसांच्या घडणुकांनी १४.३% वाड जाल्या. बार्देसांत सगल्यांत चड घडणुको घडल्यात.
गोंयच्या खुबश्या दोतोरांनी ह्या वाडपी प्रमाणा विशीं चिंता उक्तायतना, जाण्ट्यां दुयेंती वांगडा तरणाट्यांक मरण येवपाचें प्रमाण सेगीत वाडत आसा अशें तांणी सांगलें.
१.७ लाख लोकांची तपासणी : ५ हजार काळजाच्या आताकाचीं प्रकरणां
जीएमसीच्या डेटा वांगडा काळजाच्या आताकाचो सोद घेवपा खातीर सरकारी उपक्रम आशिल्ले एसटीईएमआय कार्यावळंत फाटल्या चार वर्सांनी गोंयांत ५ हजार काळजाच्या आताकाचीं प्रकरणां नोंद आसात. जातूंत १.७ लाखां परस चड लोकांची तपासणी केल्या.
डीएचएस सुत्रांनी सांगलें, अंदूंय शिबिरांनी ‘रिअल टायम’त खुबशीं प्रकरणां दिसून आयल्यांत. हीं प्रकरणां रोखडीच हाताळ्ळीं.
२० ते ३० पिरायेच्या गटाची तपासणी गरजेची
आतां २० आनी ३० पिरायेच्या तरणाट्यांची ब्लड प्रेशर आनी कोलेस्टेरॉलाची नेमान तपासणी करपाची वेळ आयिल्ल्याचें दोतोर सांगतात. जीव घेवपी परिस्थिती येवचे पयलीं तपासणी करून जतनाय घेवप गरजेचें आशिल्ल्याचें दोतोरांनी सांगलें.
पुश्टीक आहार घेवचो, नेमान व्यायाम करचो, तशेंच तंबाखू आनी सोर्याचो वापर उणो करपा खातीर डीएचएस कडल्यान भौशीक भलायकी मोहिमोय खर केल्यात.
मजगतीं, २०२४-२५ च्या अर्थीक सर्वेक्षणांत अशें दिसून आयलां, गोंयांत ४७% सैमीक मरण हें काळजाचें दुयेंस, कॅन्सर आनी गोडेंमूत अश्या असंसर्गजन्य दुयेंसांक लागून जातात, हाका लागून ह्या संकटाची खरपणां अधोरेखीत जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
